सोनम वांगचुक यांची प्रकृती स्थिर; सफदरजंग रुग्णालयात वैद्यकीय देखरेखीखाली उपचार
दिल्लीतील जंतर-मंतर येथून हटवल्यानंतर सामाजिक कार्यकर्ते सोनम वांगचुक यांना सफदरजंग रुग्णालयात दाखल करण्यात आले असून त्यांची प्रकृती सध्या स्थिर असल्याची माहिती सूत्रांनी दिली आहे.
सूत्रांच्या माहितीनुसार, वांगचुक यांना सफदरजंग रुग्णालयाच्या आपत्कालीन विभागात (Emergency Ward) दाखल करण्यात आले असून ते शुद्धीवर आहेत. त्यांच्या महत्त्वाच्या शारीरिक तपासणीचे (Vital Parameters) सर्व निकष स्थिर असून डॉक्टरांच्या देखरेखीखाली त्यांच्यावर उपचार सुरू आहेत.
दरम्यान, गेल्या २० दिवसांपासून उपोषण करत असलेल्या वांगचुक यांना शनिवारी सकाळी दिल्ली पोलिसांनी जंतर-मंतर येथील आंदोलनस्थळावरून हटवून रुग्णालयात हलवले. त्यानंतर दिल्ली पोलिसांनी जंतर-मंतर परिसरातील इतर आंदोलनकर्त्यांनाही हटविण्याची कारवाई सुरू केली.
आंदोलनस्थळी दिल्ली पोलिसांचा मोठा बंदोबस्त तैनात करण्यात आला असून आंदोलनकर्त्यांना परिसर रिकामा करण्याचे निर्देश देण्यात आले आहेत. त्यामुळे जंतर-मंतर परिसरात तणावपूर्ण वातावरण निर्माण झाले आहे.
