Nashik Cyber Crime : सायबर भामट्यांकडून वेगवेगळ्या माध्यमांतून लक्ष्य करताना फसवणुकीचे प्रकार घडविले जात आहेत. नुकताच घडलेल्‍या दोन वेगळ्या घटनांमध्ये भामट्यांनी एकूण सत्तर लाखांना गंडविल्‍याचे समोर आले आहे. यापैकी एका प्रकरणात शेअर बाजारात जादा परताव्‍याचे आमिष दाखवत फसविले. तर दुसऱ्या घटनेत ‘व्‍हर्च्युअल अरेस्ट’ करण्यासाठी धमकावत पैसे उकळल्‍याचे समोर आले आहे. (Cyber ​​criminals cheated 70 lakhs)

पहिल्‍या घटनेत द्वारका परिसरातील ५९ वर्षीय महिलेने फिर्याद दिली आहे. त्‍यानुसार भामट्यांनी १३ सप्टेंबरला त्‍यांना २३ लाख रुपयांचा गंडविले. दिल्ली पोलिस, सीबीआय, ट्राय विभागातून बोलत असल्याचे भासवीत संशयितांनी वृद्ध महिलेला घाबरविले. मनी लॉड्रींगच्‍या प्रकरणात त्‍यांचा सहभाग असल्‍याचे सांगत गुन्‍ह्‍यात अटक करण्याचे सांगत भीती निर्माण केली. अटक टाळण्यासाठी ऑनलाइन पद्धतीने २३ लाख रुपये उकळले. फसवणूक झाल्‍याचे लक्षात येताच महिलेने सायबर पोलिस ठाण्यात गुन्‍हा दाखल केला.

दुसऱ्या घटनेत गंगापूर रोडवरील महिला डॉक्टरसह इतर चौघांना भामट्यांनी जादा परताव्‍याचे आमिष दाखवत ४६ लाख ४७ हजार ३४८ रुपयांना गंडविले. सायबर भामट्यांनी २२ नोव्हेंबर २०२३ ते २६ जुलै २०२४ या कालावधीत ही फसवणूक केली. शेअर बाजारात जादा परतावा मिळवून देतो, असे आमिष दाखवत पाच जणांकडून भामट्यांनी ४६ लाख रुपये उकळले. अखेर फसवणूक होत असल्‍याचे लक्षात घेता, सायबर पोलिस ठाण्यात गुन्‍हा दाखल केला आहे.