मालेगाव : कॉंग्रेसचे ज्येष्ठ नेते डॉ. तुषार शेवाळे यांची पक्षाच्या प्रदेश सरचिटणीसपदी नियुक्ती करण्यात आली आहे. पक्षाचे महाराष्ट्र प्रभारी रमेश चेन्नीथलाजी यांच्या मान्यतेनुसार व प्रदेशाध्यक्ष नाना पटोले यांच्या सुचनेनुसार ही निवड करण्यात आली आहे. पक्षाचे प्रशासन व संघटन उपाध्यक्ष नाना गावंडे यांनी डॉ. शेवाळे यांना निवडीचे पत्र पाठविले आहे. (Dr. Tushar Shewale of Congress Appointed as State General Secretary)

कॉंग्रेसकडून धुळे लोकसभा निवडणूक लढविण्यासाठी डॉ. शेवाळे इच्छूक होते. त्यांनी गेल्या सहा महिन्यापासून तयारी केली होती. मात्र पक्ष नेतृत्वाने ऐनवेळी डॉ. शोभा बच्छाव यांना उमेदवारी दिली.

उमेदवारी न मिळाल्याने नाराज झालेल्या डॉ. शेवाळे यांनी कॉंग्रेसच्या नाशिक ग्रामीण जिल्हाध्यक्षपदाचा राजीनामा दिला होता. (latest marathi news)

राजीनामा मंजूर झाल्यानंतर त्यांच्या जागी माजी आमदार शिरीष कोतवाल यांची नियुक्ती करण्यात आली.

प्रदेश सरचिटणीसपदाची जबाबदारी सोपवून डॉ. शेवाळे यांची नाराजी दूर करण्याचा प्रयत्न कॉंग्रेस नेतृत्वाकडून केला जात आहे. पक्षाने ही त्यांना पदोन्नती दिल्याची भावना समर्थकांनी व्यक्त केली आहे.