Nashik News : नाशिकचे विभागीय आयुक्त राधाकृष्ण गमे हे ३१ मेस निवृत्त होत असल्याने त्यांच्या जागेवर येण्यासाठी वरिष्ठ अधिकाऱ्यांकडून आतापासूनच ‘फिल्डिंग’ लावण्यास सुरवात झाल्याचे समजते. यात नाशिक महापालिकेचे माजी आयुक्त प्रवीण गेडाम, माजी जिल्हाधिकारी दीपेंद्रसिंह कुशवाह, राधाकृष्णन बी यांच्या नावांची महसूल विभागाच्या अधिकाऱ्यांमध्ये चर्चा आहे. (Fielding of officers for post of Divisional Commissioner)

त्यामुळे यापैकी कुणाची नियुक्ती होते की अन्य अधिकारी येथे नियुक्त होतात, याकडे सर्वांचे लक्ष लागले आहे. विधान परिषदेच्या शिक्षक मतदारसंघाची निवडणूक विभागीय आयुक्तांच्या अध्यक्षतेखालीच पार पडते. या निवडणुकीची घोषणा झाल्याने विभागीय आयुक्तपद दीर्घकाळ रिक्त ठेवणे अशक्य आहे. त्यादृष्टीने आतापासूनच अधिकाऱ्यांचे नियोजन सुरू झाले.

तसेच २०२७ मध्ये होणाऱ्या सिंहस्थ कुंभमेळ्याचे नियोजन सुरू झाले असून, या पार्श्वभूमीवर येथे कुणाला नियुक्ती मिळणार, याबाबतची उत्सुकता वाढली आहे. यापूर्वी नाशिक महापालिकेचे आयुक्त राहिलेले प्रवीण गेडाम विभागीय आयुक्तपदासाठी इच्छुक असल्याची चर्चा आहे. याशिवाय, २०१५ च्या सिंहस्थ काळात जिल्हाधिकारी राहिलेले दीपेंद्रसिंह कुशवाह. (latest marathi news)

माजी जिल्हाधिकारी राधाकृष्णन बी यांसह आदिवासी विकास आयुक्तालयातील नयना गुंडे याही विभागीय आयुक्तपदाच्या शर्यतीत असल्याची महसूल वर्तुळात चर्चा आहे. गमे यांच्या निरोप समारंभानिमित्त वरिष्ठ अधिकारी नाशिकला भेट देणार असल्याचे समजते. अधिकारी नियुक्तीची चर्चा आतापासून सुरू झालेली असली, तरी लोकसभा निवडणुकीच्या निकालानंतरच आदेश निघतील, असाही अंदाज वर्तविला जात आहे.

...तर आदिवासी आयुक्त बदलतील

आदिवासी विकास विभागाच्या आयुक्त नयना गुंडे यांची विभागीय आयुक्तपदी नियुक्ती झाल्यास नंदुरबारच्या जिल्हाधिकारी मनीषा खत्री यांची आदिवासी आयुक्तपदावर वर्णी लागण्याची शक्यता वर्तविली जाते. खत्री यांचे पती जिल्हाधिकारी जलज शर्मा यांच्याकडे सध्या नाशिकची जबाबदारी आहे. त्यादृष्टीने खत्री प्रयत्नशील असल्याचे बोलले जाते.