Nashik Fire Accident : शहरात रविवारी (ता. २१) तीन वेगवेगळ्या ठिकाणी आगीच्या घटना घडल्या. तिन्ही घटनांत सुमारे ५५ हजारांचे नुकसान झाले. अग्निशमन दलाच्या सतर्कतेने लाखो रुपयांचे नुकसान टळले. सुदैवाने कुठलीही जीवितहानी झाली नाही. येथील सोयगाव भागातील चर्चजवळील लोटस हॉस्पिटलजवळ गॅसगळतीने विजय प्रदीप परदेशी (रा. गवती बंगला, दाभाडी रोड) यांच्या कपडे प्रेस करणाऱ्या टपरीला आग लागली. (Nashik Fire Accident Damage of 55 thousand in 3 incidents of fire in Malegaon city )

यात टपरी व टेबलचे सुमारे पन्नास हजारांचे नुकसान झाले. सोयगाव येथील अग्निशमन विभागाच्या बंबाने आग आटोक्यात आणली. दुपारी पावणेदोनच्या सुमारास ही घटना घडली. आगीची दुसरी घटना मनमाड चौफुली येथे घडली. नवीन रवजी पानसानी यांच्या भगवान स्वामील लाकूड वखारला आग लागली.

यात पाच हजारांचा लाकडी भुसा जळाला. रविवारी (ता. २१) सकाळी साडेआठच्या सुमारास हा प्रकार घडला. वेळेत अग्निशमन दलाच्या बंबाने आग विझवली. त्यामुळे येथील घटनेत मोठे नुकसान टळले.

तिसरी घटना नानावटी पेट्रोल पंपामागील कलेक्टर पट्टा भागातील मोकळ्या भूखंडावर घडली. भूखंडावरील प्लॅस्टिकच्या कचऱ्याला अचानक आग लागली. आग आटोक्यात आणण्यासाठी अग्निशमन विभागप्रमुख संजय पवार यांच्या मार्गदर्शनाखाली सुनील बागूल, प्रदीप शिंदे, शरद चौधरी, भूषण अहिरे, रफिक खान, मोहन बैरागी आदींनी प्रयत्न केले.