नाशिकरोड : नाशिक रेल्वे स्थानकातुन भुसावळकडे जाणाऱ्या गोदान एक्सप्रेसच्या पार्सल बोगीला आग लागली. गाडी थांबवून बोगीची आग वेळीच विझवण्यात आली त्यामुळे मोठा अनर्थ टळला. (Nashik Fire accident parcel carriage of Godan Express marathi news)

मुबंई लोकमान्य टिळक टर्मिनस वरून -गोरखपूरला जाणारी गोदान एक्सप्रेस आज दुपारी नेहमी प्रमाणे नाशिकरोड रेल्वे स्थानकात आली. स्थानक सोडल्या नंतर गोरेवाडी नजीक, मनपाच्या जलशुद्धकरण केंद्रा जवळून गोदान एक्सप्रेस जात असतांना गाडीच्या मागील पार्सल बोगी मधून धुराचे लोट बाहेर येऊ लागले.

काही क्षणांतच वाऱ्यामुळे बोगीमधून धुरा बरोबर अगीचे लोट येऊ लागले. सदर बाब शेजारील बोगी मधील प्रवासींच्या लक्षात आल्याने त्यांनी आरडाओरड केली. त्यानंतर गाडीच्या गार्डला समाजल्य नंतर त्यांनी तत्काळ गाडी थांबवण्याचा निर्णय घेतला. गाडी थांबताच प्रवाशांनी चालत्या गाडीतून उड्या मारल्या.

तत्काळ अग्निशामक दलाला कळवण्यात आले, तोपर्यंत रेल्वे कर्मचारी यांनी फोमच्या सहाय्याने आग विझावण्याचा प्रयत्न केला मात्र आग आटोक्यात येत नव्हती. स्थानक प्रबंधक श्रीवास्तव, रेल्वे सुरक्षा दलाचे पोलीस निरीक्षक हरफूलसिंह यादव, सहाय्यक पोलीस निरीक्षक मंगेश सोननसे, लोहमार्ग पोलीस निरीक्षक महेश कुलकर्णी, पोलीस हवालदार संतोष उफाडे पाटील, कुलकर्णी आप्पा, आदिसह अधिकारी कर्मचारी यांनी घटनास्थळी धाव घेतली.  (latest marathi news)

अग्निशमन दल घटनास्थळी पोहचले, मात्र हाय टेन्शन असलेला विद्युत पुरवठा पूर्ववत असल्याने बोगीवर पाणी मारणे शक्य नव्हते. अधिकारी व कर्मचारी यांनी तात्काळ बोगी पासून आगीने बाधित बोगी वेगळी करण्याचा निर्णय घेतला. बोगी वेगळी झाल्यानंतर गोदान एक्सप्रेस पुढील प्रवासाला रवाना झाली.

या बाधित बोगीच्या शेजारी सर्वसाधारण बोगी होती, मात्र गाडी स्थनकातून सुटल्याने हळू धावत होती, म्हणून जीवितहानी झाली नाही, जर गाडी अजून काही किलोमीटर गेली असती तर मोठी दुर्घटना झाली असती. रेल्वेचे वरिष्ठ अधिकारी नाशिक कडे रवाना झाले असून या घेतानेची उच्च सत्तरावर चौकशी होईल असे एका रेल्वे अधिकारीने सांगितले. बाधित बोगीमध्ये कशाने आग लागली हे मात्र स्पष्ट झाले नाही.