Nashik Fire Accident : दापूर (ता. सिन्नर) येथे सोमवारी (ता. २५) पहाटे पाचच्या सुमारास पत्र्याच्या शेडवजा घराला शॉर्टसर्किटमुळे लागलेल्या आगीत दुचाकीसह संसारापयोगी साहित्य खाक झाले. सत्यवान बाळू पालवे यांचे शेतात पत्र्याचे शेडवजा घर आहे. रविवारी (ता. २४) रात्री जेवणानंतर सर्वजण शेजारी असलेल्या दुसऱ्या घरात झोपण्यासाठी गेले. सोमवारी पहाटे पाचच्या सुमारास अचानक उष्णता जाणवू लागल्याने पालवे यांना जाग आली. (Nashik House on fire in Dapur)

शेजारच्या घरातील साहित्याला आग लागल्याचे पाहून त्यांनी बाहेर धाव घेतली. आरडाओरड करत आजूबाजूच्या शेतकऱ्यांना मदतीसाठी बोलावले. पाण्याचा मारा करून आग विझविण्याचा प्रयत्न केला. मात्र, तो अयशस्वी ठरला.

आगीत दुचाकीसह संसारोपयोगी साहित्य, कपडे, रोकड, दोन तोळ्यांचे सोन्याचे दागिने खाक झाले. याबाबत माहिती मिळताच योगेश आव्हाड, ग्रामपंचायत सदस्य नवनाथ आव्हाड, जगन्नाथ सोनवणे.

दत्ता सोनवणे, योगेश सोनवणे, अमोल शिंदे आदींनी घटनास्थळी धाव घेतली. नायब तहसीलदार सागर मुंदडा यांनी तलाठी व ग्रामविकास अधिकाऱ्यांना नुकसानीचा पंचनामा करण्याचे आदेश दिले .

शॉर्टसर्किटमुळे आग लागल्याचा प्राथमिक अंदाज आहे. आगीमुळे पालवे कुटुंबीय रस्त्यावर आले आहे. शासनाने या कुटुंबाला नुकसानभरपाई द्यावी, अशी मागणी दापूर ग्रामस्थांनी केली आहे.