वाडीवऱ्हे : इगतपुरी तालुक्यातील धारगाव ग्रामपंचायतपैकी धारचीवाडी, नाकडवाडी, कोरळवाडी, खडाडवाडी या वाड्यांना गेल्या महिन्यापासून पाणीपुरवठा होत नसल्याने येथे पिण्याच्या पाण्याची भीषण टंचाई तयार झाली आहे. एक हंडाभर पाण्यासाठी आदिवासी महिलांना वणवण करावी लागत आहे. तर अनेक महिला आपला स्वत:चा जीव धोक्यात घालून कॅनॉलमध्ये उतरून पाणी आणत आहे. (Nashik Water Crisis)

इगतपुरी तालुक्यातील धारगाव ग्रामपंचायतंर्गत येणाऱ्या धारचीवाडी, नाकडवाडी, कोरळवाडी, खडाडवाडी या वाड्या आहे. वैतरणा धरणाखालील या आदिवासी वाड्या आहेत. गेल्या महिन्यापासून पाणीपुरवठा होत नसल्याने या वाड्यावरील महिलांना पाण्यासाठी वणवण करण्याची वेळ आलेली आहे.

अनेकदा महिला आपला जीव धोक्यात घालून वैतरणा धरणातून वीजनिर्मिती केंद्राला पाणी पुरवठा करणाऱ्या कालव्यात उतरून पाणी आणत आहे. धरणातून सोडलेल्या पाण्याला प्रचंड वेग असतो. (latest marathi news)

त्या पाण्यात पडल्यानंतर त्यांना वाचणे शक्य नाही. अशी परिस्थिती असताना देखील आपला जीव धोक्यात घालून पाणी आणावे लागत आहे. या वाड्यांना पुरवठा करण्यासाठी दोन कोटी रुपयांची जलजीवन योजना राबविण्यात येत आहे.

ही योजना शोभेची वस्तु ठरत आहे. एक वर्ष झाले टाकी बांधून ठेवली. मात्र पाणी पुरवठा सुरू झाला नाही. या सर्व वाड्यांवर पाणी पुरवठा सुरू झाला नाही तर एल्गार कष्टकरी संघटना आंदोलन करेल असा इशारा अध्यक्ष भगवान मधे यांनी दिला आहे.