Nashik News : राष्ट्रीय आरोग्य अभियानातर्फे प्राथमिक आरोग्य केंद्रात स्वच्छतेसह आरोग्यदायी वातावरण निर्माण व्हावे व आरोग्याच्या चांगल्या सुविधा नागरिकांना मिळाव्यात, या उद्देशाने राज्य शासनातर्फे राबविण्यात येत असलेल्या ‘स्वच्छ भारत मिशन’ अंतर्गत ‘कायाकल्प’ पुरस्कारासाठी जिल्ह्यातील २३ प्राथमिक आरोग्य केंद्रे व ५६ आरोग्यवर्धिनी उपकेंद्रांची निवड करण्यात आली आहे. (kayakalp Award to 23 Primary Health Centers in District)

जिल्हास्तरावरील प्रथम क्रमांकाचे दोन लाखांचे बक्षीस मोहाडी (ता. दिंडोरी) प्राथमिक आरोग्य केंद्राने, तर विल्होळी (ता. नाशिक) उपकेंद्राने एक लाखाचे बक्षीस पटकावले. २ ऑक्टोबर २०१४ पासून हे अभियान राबविण्यात येत आहे. पुरस्कारासाठी निवड झालेल्या २२ आरोग्य केंद्रांना ५० हजार रुपये मिळणार आहेत. बेलगाव ढगा (ता. नाशिक) उपकेंद्राला द्वितीय क्रमाकांचे ५० हजार, तर तृतीय क्रमांकाचे ३५ हजारांचे बक्षीस वाजगाव (ता. देवळा) उपकेंद्राने मिळविले आहे.

उर्वरित ५३ आरोग्य उपकेंद्रांना २५ हजार मिळणार आहेत. पुरस्कार जाहीर झालेल्यांमध्ये वाडीवऱ्हे, काळुस्ते (इगतपुरी), जातेगाव, सय्यद पिंप्री, धोंडेगाव (नाशिक), उसवाड, वडनेरभैरव (चांदवड), तळेगाव (दिंडोरी), कनाशी, नवी बेज, तिऱ्हळ खु., ओतूर (कळवण), अंबोली चिंचओव्हल (त्र्यंबकेश्वर), चांदोरी, ओझर (निफाड), जायखेडा, ब्राह्मणगाव (बागलाण), पांढुर्ली, वावी (सिन्नर), खामखेडा (देवळा), आंबे (पेठ) या प्राथमिक आरोग्य केंद्रांचा समावेश आहे. मुख्य कार्यकारी अधिकारी आशिमा मित्तल यांच्या मार्गदर्शनाखाली ही योजना राबविण्यात आली, अशी माहिती जिल्हा आरोग्याधिकारी डॉ. सुधाकर मोरे यांनी दिली.