Nashik New : धुळे लोकसभा मतदारसंघात उन्हाचा तडाखा वाढत आहे. या वातावरणात काँग्रेस आणि भाजपच्या उमेदवारांनी जोरदार प्रचार करीत वातावरण तापवले आहे. यात काँग्रेसच्या डॉ. शोभा बच्छाव यांच्या मदतीला वरिष्ठ नेते धावून येणार आहेत. अखिल भारतीय काँग्रेसचे राष्ट्रीय अध्यक्ष मल्लिकार्जुन खरगे आणि राष्ट्रवादी शरदचंद्र पवार पक्षाचे अध्यक्ष शरद पवार हे धुळे लोकसभा मतदारसंघात सभा घेणार आहेत. (Nashik Lok Sabha Constituency)

धुळे मतदार संघात महाविकास आघाडीतर्फे काँग्रेसच्या डॉ. बच्छाव यांना उमेदवारी जाहीर झाली आहे. डॉ. बच्छाव यांच्या नावाची घोषणा झाल्यावर पक्षाच्या काही नेत्यांनी त्यांना विरोध केला होता. नाशिक आणि धुळेच्या जिल्हाध्यक्षांनी राजीनामे देत नाराजी व्यक्त केली होती. त्यामुळे निवडणुकीच्या प्रचारात बच्छाव यांना अडचणी निर्माण झाल्या होत्या.

मात्र आता डॉ. बच्छाव यांनी मतदारसंघातील प्रचारावर लक्ष केंद्रित केले आहे. धुळे शहरासह ग्रामीण भागात महाविकास आघाडीचे सर्व घटक पक्ष आणि नेते त्यांच्या प्रचारात सहभागी झाले आहेत. विशेषत: मालेगाव शहरातील मतदारांना पक्षाकडे वळविण्यासाठी काँग्रेसने जोरदार प्रयत्न सुरू केले आहेत. (Latest Marathi News)

गत आठवड्याभरात मतदारसंघात नाराज नेत्यांच्या गाठीभेटी घेऊन ही नाराजी दूर करण्यात त्या यशस्वी झाल्याचे दिसत आहे. धुळ्याचे जिल्हा अध्यक्ष श्याम सनेर त्यांच्या प्रचारात सक्रिय झाले आहेत. धुळे मतदारसंघातील प्रचारासाठी येत्या १२ मेस काँग्रेसचे राष्ट्रीय अध्यक्ष मल्लिकार्जुन खरगे दोंडाईचा येथे सभा घेणार आहेत.

या सभेसाठी जिल्हाध्यक्ष सनेर यांनी पुढाकार घेतला आहे. सभेचे सर्व नियोजन ते करणार आहे. याशिवाय राज्यातील महाविकास आघाडीचे नेते शरद पवार व संजय राऊत येत्या १६ मेस सटाणा येथे काँग्रेसच्या उमेदवारासाठी प्रचार सभा घेणार आहेत. या सभेमुळे काँग्रेस आणि महाविकास आघाडीच्या प्रचाराला चालना मिळणार आहे.