Nashik News : लोकसभेच्या नाशिक व दिंडोरी मतदारसंघात जवळपास चित्र स्पष्ट झाल्यानंतर आता प्रचाराकडे उमेदवारांनी लक्ष दिले आहे. प्रचाराचे नियोजन करताना शेवटच्या टप्प्यात नाशिक व दिंडोरीमध्ये महाविकास आघाडी विरुध्द महायुती असे प्रचार युध्द पाहायला मिळणार आहे. (Nashik Lok Sabha Constituency)

दिंडोरीत गड भक्कम करण्यासाठी पंतप्रधान नरेंद्र मोदी स्वत: मैदानात उतरणार असल्याने त्यानंतर महाविकास आघाडीकडून शरद पवार व उद्धव ठाकरे दिंडोरी व नाशिकसाठी दोन दिवस तळ ठोकणार आहेत. नाशिक लोकसभा मतदारसंघांमध्ये उमेदवारी अर्ज दाखल झाल्यानंतर आता सहा मे रोजी माघारी आहे.

माघारीनंतर खऱ्या अर्थाने चित्र स्पष्ट होईल. अशीच परिस्थिती दिंडोरी लोकसभा मतदारसंघांमध्ये आहे. दोन्ही मतदारसंघात उमेदवारांकडून सध्या प्रचारावर भर दिला जात आहे. मात्र उमेदवारांच्या जोडीला महायुती व महाविकास आघाडीच्या वरिष्ठ नेत्यांची फौज दाखल होणार आहे. महायुतीकडून दिंडोरीचा गड भक्कम करण्यासाठी पंतप्रधान नरेंद्र मोदी यांची पिंपळगाव बसवंत येथे दहा मे रोजी सभा होणार आहे.

त्याचबरोबर महायुतीचे अन्य नेते देखील नाशिक व दिंडोरीमध्ये प्रचाराचे मैदान गाजविणार आहेत. महायुतीकडून प्रचाराचे योग्य नियोजन केले जात असताना महाविकास आघाडीने देखील वरिष्ठ नेत्यांची फौज मैदानात उतरविण्याचा निर्णय घेतला आहे. त्यामध्ये राष्ट्रवादी काँग्रेस -शरदचंद्र पवार पक्षाचे अध्यक्ष शरद पवार व शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांची संयुक्त सभा होणार आहे. (Latest Marathi News)

महाविकास आघाडीची संयुक्त सभा

दिंडोरी लोकसभा मतदारसंघातील राष्ट्रवादी काँग्रेसचे उमेदवार भास्कर भगरे यांच्या प्रचारासाठी शरद पवार तीन सभा घेणार आहेत. वणी येथे १५ मे व १६ मे रोजी लासलगाव तसेच नांदगाव येथे सभा होणार आहेत. नाशिक तालुक्यातील सय्यदपिंपरी येथे देखील सभा घेण्याचे नियोजन आहे.

शरद पवार व उद्धव ठाकरे यांची अनंत कान्हेरे मैदानावर संयुक्त सभा घेण्याचे नियोजन १५ मे रोजी करण्यात आले आहे. शिवसेनेच्या उपनेत्या सुषमा अंधारे यांची १२ मे रोजी देवळाली येथे प्रचार सभा होईल. राष्ट्रवादी काँग्रेसचे प्रदेशाध्यक्ष जयंत पाटील, काँग्रेसचे प्रदेशाध्यक्ष नाना पटोले.

बाळासाहेब थोरात, शिवसेनेचे प्रवक्ते संजय राऊत यांच्यादेखील सभा होणार आहेत. त्याचबरोबर १७ मे रोजी युवा सेनाप्रमुख आदित्य ठाकरे यांची सिन्नर व सिडकोत सभा होतील. खासदार अमोल कोल्हे, आमदार रोहित पवार, मेहबूब शेख, काँग्रेसच्या प्रणिती शिंदे यांची सभा घेण्याचे नियोजन केले जात आहे.