Nashik News : शहरातील पारंपरिक मिरवणूक मार्गावरून महाविकास आघाडीचे उमेदवार राजाभाऊ वाजे यांची विजयी मिरवणूक काढण्यात आली. पक्ष कार्यालयपासून मिरवणुकीस प्रारंभ झाल्यानंतर खडकाळी, दूध बाजार फुले मार्केट कोकणीपुरा चौक येथे मुस्लिम बांधवांकडून वाजे यांचे जल्लोषात स्वागत करण्यात आले. (Nashik Lok Sabha Election 2024 Result)

नाशिक लोकसभा मतदार संघातून महाविकास आघाडी उद्धव बाळासाहेब ठाकरे पक्षाचे उमेदवार राजाभाऊ वाजे यांनी महायुतीचे उमेदवार हेमंत गोडसे यांचा पराभव केला. पूर्ण मतमोजणी झाल्यानंतर श्री. वाजे यांनी रात्री पारंपरिक मिरवणूक मार्गावरून विजयी मिरवणूक काढण्यात आली.

पहिल्यांदाच विजयी उमेदवारांनी जुने नाशिक परिसरात येऊन येथील नागरिकांची भेट घेत सत्कार स्वीकारला. मिरवणुकीत माजी आमदार वसंत गीते, माजी महापौर विनायक पांडे, यतीन वाघ, महानगर प्रमुख सुधाकर बडगुजर, ज्येष्ठ नेते दत्ता गायकवाड यांच्यासह आदी ज्येष्ठ नेते आणि महिला पदाधिकाऱ्यांसह कार्यकर्ते मिरवणुकीत सहभागी झाले. (latest marathi news)

धार्मिक एकतेचे दर्शन

राजाभाऊ वाजे यांची विजय मिरवणूक सुरू असताना खडकाळी परिसरात रात्रीच्या इशाची नमाज पठणाची वेळ झाली. अजान सुरू होताच श्री. वाजे यांच्या सूचनेवरून डीजे बंद करण्यात आला. सर्वजण कुठल्याही प्रकारची घोषणाबाजी न देता पाच मिनिटांसाठी स्तब्ध राहिले. अजान संपताच पूर्वत मिरवणूक सुरू झाली.

दरम्यान मुस्लिम बहुल भागात मिरवणूक सुरू असताना सर्व मुस्लिम बांधवांचे आभार व्यक्त करत हिंदू मुस्लिम बांधव एकत्र असल्याची कवाली डीजेवर वाजवण्यात आली. यातून धार्मिक एकतेचे दर्शन घडून आले.