Nashik Lok Sabha Election : लोकसभा निवडणूकीच्या पार्श्‍वभूमीवर निवडणूक आयोगाने आचारसंहिता केल्यानंतर प्रशासनाकडून नियमांची काटेकोरपणे अंमलबजावणी केली जात आहे. तसेच राजकीय नेते, इच्छुक उमेदवार यांनीही या आचारसंहितेचा धसका घेत जपून पावले उचलली जात आहेत. लोकसभा निवडणुकीची आचारसंहिता जाहीर होताच महानगरपालिका प्रशासन सक्रिय झाले आहे. (Nashik Lok Sabha Election Implementation of code of conduct marathi news)

मनपा क्षेत्राचे सर्व प्रमुख रस्ते, चौक व विविध भागातील बॅनर, झेंडे, फ्लेक्स जमा करण्यात आले आहेत. विविध विकासकामांच्या कोनशिला, कमानी, राजकीय पक्षांच्या नेत्यांची नावे झाकण्यात आली आहेत. पालिका प्रशासनाकडून विविध विभागप्रमुखांना आचारसंहितेच्या अंमलबजावणीबाबत सूचना दिल्या आहेत. मनपा आयुक्तांकडून आढावा बैठका घेतल्या जात आहेत.  (latest marathi news)

शहरातील सर्व राजकीय पक्ष, पक्षाचे नेते, विविध पक्षाचे कार्यकर्ते आणि स्थानिक नागरिक यांनी लोकसभा सार्वत्रिक निवडणुक २०२४ चे आदर्श आचारसंहितेचे पालन करुन हा निवडणुकीचा उत्सव निर्विघ्नपणे पार पाडावा, असे आवाहन केले जात आहे. तसेच ‘आचारसंहिता नियंत्रण कक्ष’ स्थापन करण्यात आला असून सदर कक्ष २४ तास सुरु असणार आहे.

दैनंदिन खर्चाची नोंद

लोकसभा निवडणूक लढविणाऱ्या उमेदवारांना निवडणूक संपल्यानंतर खर्च सादर करणे बंधनकारक असते. त्यामुळे प्रत्येक उमेदवार निवडणूक काळात प्रचारासाठी ज्या वाहनांचा वापर करतील, जो काही खर्च करतील त्या खर्चाची नोंद तारखेनिहाय करावी लागणार आहे.त्यामुळे प्रत्येक उमेदवारांकडून काळजी घेतली जात आहे. निवडणूक आयोगाच्या प्रतिनिधींकडून प्रत्येक मतदारसंघावर बारकाईने लक्ष असणार आहे.