मनमाड : युनियन बँक शाखेतील कथित ‘एफडी घोटाळा’ गाजत असतानाच आमदार सुहास कांदे यांनी ठेवीदारांना दिलेला विश्‍वास गुरुवारी (ता. ३०) सत्यात उतरवून दाखवला. सदर प्रकरणातील ७ ग्राहकांना त्यांच्या मुदत ठेवीची रक्कम व्याजासह त्यांच्या खात्यावर वर्ग करण्यात आली. आमदार सुहास कांदे यांच्या हस्ते या ७ ग्राहकांना २० लाख रूपये जमा करण्यात आल्याचे पत्र अधिकाऱ्यांनी दिले.

इतरांचेही पैसे मिळेपर्यंत आपण गप्प बसणार नाही, असा इशारा आमदार कांदे यांनी यावेळी दिला. येथील युनियन बँक शाखेत कोट्यवधी रुपयांचा एफडी घोटाळा झाला होता. मोठा अपहार झालेल्या या घटनेने केवळ नाशिक जिल्हाच नव्हे, तर संपूर्ण राज्यात खळबळ उडाली. शहरातील नागरिकांसह परिसरातील नोकरदार.

व्यापारी, कामगार, शेतकऱ्यांचे पैसे अडकल्यामुळे हवालदिल झालेल्या ठेवीदारांनी फसवणूक झाल्याने आमदार सुहास कांदे यांच्याकडे धाव घेऊन आम्हाला आमचे पैसे परत मिळवून देण्याची मागणी निवेदनाद्वारे केली होती. बँकेकडे प्राप्त तक्रारीनुसार सुमारे १२५ ग्राहकांच्या ७ कोटी २५ लाख रूपये रकमेचा अपहार झाला आहे.

याप्रकरणी पोलिसात संशयित संदीप देशमुख आणि बँक अधिकारी, कर्मचाऱ्यांविरुद्ध गुन्हे दाखल झाले. देशमुख यास अटक झाली. आमदार कांदे यांनी याप्रकरणी ग्राहकांना त्यांचे पैसे मिळावे म्हणून पुढाकार घेतला व स्वतः पोलिसात गुन्हा दाखल केला. आमदारच फिर्यादी झाल्याने बॅंक प्रशासनाचे धाबे दणाणले.

पैशांचा अपहार झालेल्या सर्व ग्राहकांना त्यांचे पैसे परत मिळण्यासाठी आमदार कांदे यांनी पुढाकार घेतला. त्यासाठी बँकेच्या वरिष्ठांशी सातत्याने पाठपुरावा केला. या संपूर्ण प्रकरणाची कसून चौकशी करण्यासाठी एसआयटी चौकशी समितीही नेमली. त्यामुळे बँकेने हे प्रकरण गंभीरतेने घेतले व आजअखेर ७ ग्राहकांना २० लाख रूपयांची व्याजासह रक्कम वितरीत करण्यात आली.

यावेळी युवासेना जिल्हाप्रमुख फरहान खान, रिपाइंचे जिल्हाप्रमुख राजेंद्र आहिरे, भाजप जिल्हा उपाध्यक्ष नितीन पांडे, गंगादादा त्रिभुवन, शिवसेना शहरप्रमुख मयुर बोरसे, योगेश पाटील, योगेश इमले, महेंद्र शिरसाठ आदींसह शिससेना, भाजप, रिपाई महायुतीचे पदाधिकारी व कार्यकर्ते मोठ्या संख्येने उपस्थित होते.