इगतपुरी : मराठा समाजाला आरक्षण मिळावे, यासाठी मनोज जरांगे-पाटील यांनी आंदोलनाची हाक दिली आणि बघता बघता राज्यातील मराठा समाज जरांगे-पाटील यांच्याशी पाठीशी उभा राहिला आणि क्रांती घडली. जरांगे-पाटील (Manoj Jarange Patil) मराठा समाजाचे दैवत बनले. विवाह सोहळ्याच्या लग्नपत्रिकेत वधू-वरास शुभाशीर्वाद म्हणून मराठा संघर्ष योद्धा मनोज जरांगे-पाटील यांचे नाव मराठा समाजातील तरुण तरुणींच्या लग्नपत्रिकेच्या दर्शनी भागात झळकू लागले आहे. (Nashik Manoj Jarange Patil marathi news)

आंतरवली सराटी येथे मनोज जरांगे-पाटील यांनी मराठा समाजाला आरक्षण मिळावे, म्हणून उपोषण केले आणि बघता बघता जरांगे-पाटील यांची राज्य नव्हे, तर देशात मराठा समाजाचे नेते म्हणून ओळख बनली. त्यांच्या सभांना राज्यात लाखोंची गर्दी होऊ लागली. त्यांच्या आंदोलनाने मराठा आरक्षणाबाबत राज्य सरकारला महत्त्वपूर्ण निर्णय घेण्यास भाग पडले.

त्यामुळे जरांगे-पाटील मराठा समाजातील तरुण तरुणींच्या गळ्यातील ताईत बनले आहेत. त्यांना राज्यभरातून व्यापक पाठिंबा मिळत आहे. त्यांनी आरक्षणाच्या पाठपुराव्यासाठी पुन्हा उपोषण सुरू केले आहे. तुळशीविवाहानंतर लग्नसराईला सुरवात झाली आहे. (Latest Marathi News)

नातेवाईक, मित्र मंडळींना निमंत्रण देण्यासाठी लग्नपत्रिका छापल्या जातात. लग्नपत्रिकेत भाऊबंध, मामा मामी, काका-मावशी, मित्र, आजी-आजोबा, आत्या-मामा, जावई आदींची नावे व्यवस्थापक, स्वागतोत्सुक, संयोजक, किलबल परिवार, प्रमुख उपस्थिती, प्रेक्षक, कार्यवाहक, शुभाशीर्वाद, या प्रकारात टाकली जातात.

काही जण ‘शुभाशीर्वाद’मध्ये गुरू महाराज, मंत्री, खासदार व आमदार यांची नावे लग्नपत्रिकेत टाकतात, पण आता मराठा आरक्षणाची व्याप्ती आणि उभे राहिलेले आंदोलन व मिळालेले यश बघता विवाह सोहळ्याच्या पत्रिकेत काही परिवारांनी ‘शुभाशीर्वाद’मध्ये आमदार, खासदार, मंत्री यांच्याबरोबरीने मराठा संघर्ष योद्धा मनोज जरांगे-पाटील यांचे नाव टाकून त्यांच्याप्रति श्रद्धा व्यक्त करून एका नवीन पायंडाला सुरवात केली आहे.