नाशिक : जिल्ह्यात अग्रगण्य व जवळपास सहा आमदारांचे कार्यक्षेत्र असलेल्या नाशिक कृषी उत्पन्न बाजार समितीच्या निवडणुकीत यंदा आजी-माजी खासदारांच्या पॅनलमध्ये थेट लढतीचे चिन्हे दिसू लागली आहेत. खासदार हेमंत गोडसे यांच्या कार्यालयात झालेल्या भाजप व शिवसेना (शिंदे गट) यांच्या बैठकीमुळे या चर्चांना उधाण आले आहे. (Nashik market committee election Meeting of BJP and Shinde group sparks discussions nashik news)

हेही वाचा : एका मुलाखतीतून उलगडलेले भैरप्पा!

नाशिक कृषी उत्पन्न बाजार समितीत निवडणुकांची रणधुमाळी सुरू झाली आहे. या बाजार समितीची निवडणूक म्हणजे खासदाराची तयारीच होय. या बाजार समितीत जिल्हाभरातून नव्हे, तर इतर जिल्ह्यातूनदेखील शेतकरी भाजीपाला, फळभाज्या, कांदा, डाळिंब घेऊन येत असतात.

यापूर्वी उद्धव ठाकरे गटात असलेले खासदार हेमंत गोडसे शिंदे गटात सहभागी झाले आहेत. नाशिक बाजार समितीवर माजी खासदार देवीदास पिंगळे यांचे वर्चस्व आहे. त्यांना शह देण्यासाठीच भाजप-शिवसेना एकत्र आली आहे.

भाजपचे शहराध्यक्ष गिरीश पालवे, प्रल्हाद काकड, धनाजी पाटील, तानाजी करंजकर, शिवसेनेचे (शिंदे गट) अनिल ढिकले, सदाभाऊ नवले, सरपंच परिषदेचे तानाजी गायकर, माजी नगरसेवक तथा माजी सभापती कृषि उत्पन्न बाजार समिती शिवाजी चुंभळे, शंकरराव धनवटे, प्रताप चुभळे, अजिंक्य चुभळे आदींच्या उपस्थितीत बैठक झाली. त्या अनुषंगाने बाजार समिती मतदारसंघात चाचपणी सुरू केली आहे. खासदार गोडसे यांनी भाजप व शिवसेना गटाच्या पॅनलचे नेतृत्व करावे, अशी मागणी या वेळी करण्यात आली.