गिरणारे/गंगापूर : नाशिकच्या उत्तरेस बोरगडाच्या दक्षिणेस असलेल्या मायना या पर्यावरणीय डोंगरास गुरुवारी (ता. १७) दुपारी उत्तरेस वणवा लागला. हा वणवा थेट मायन्याच्या चारही बाजूने पसरला. तब्बल १२ वाजेपर्यंत अथक परिश्रमातून स्थानिक ग्रामस्थ, वनविभाग, वृक्षमित्रांनी मोठ्या कसोटीने विझविला. यामुळे मोठी हानी टळली असली तरी वणव्यात मात्र मायना डोंगराच्या भागातील हजारो एकरावरील अतोनात जैवविविधतेचे नुकसान झाले आहे.

दरवर्षीप्रमाणे यंदाही वणवे वाढले असून, जंगल रांगेत जाळपट्टे वाढवावे, सह्याद्रीतील डोंगररांगा, घाट, जंगल, गडकोटांच्या भूमीला संरक्षण द्यावे अशी मागणी शिवकार्य गडकोट संवर्धन संस्था, वृक्षवल्ली फाउंडेशन, दऱ्यादेवी पर्यावरण यांनी केली आहे. दुपारी बोरगडाच्या दक्षिणेस असलेल्या मायना डोंगरास वणवा लागल्याची खबर राजाराम कसबे या तरुण शेतकऱ्याने दिली. त्यानंतर वनविभाग कंट्रोलला तातडीने फोन करून खबर देण्यात आली. मायना डोंगराची आग सांयकाळपर्यंत अख्ख्या डोंगरास वळसा घालून लागली.

थेट दरी पर्यावरणीय भागात ही आग वाढत असल्याचे कळताच गवळवाडी, दरी गावाचे लोकप्रतिनिधी, ग्रामस्थ, वनविभागाचे सुनीता देशमुख, सामाजिक कार्यकर्ते विनोद जवागे, दऱ्यादेवी देवस्थान पर्यावरणाचे भारत पिंगळे, शिवाजी धोंडगे, वृक्षवल्लीचे तुषार पिंगळे, दरीचे उपसरपंच ॲड. अरुण दोंदे, राजेंद्र पिंगळे, प्रभाकर भोई, भाऊराव आचारी, संजय दोंदे, केरू बेंडकोळी, अर्जुन भोई, शीतल पिंगळे, गोकुळ धोंडगे, बाजीराव घोटे, रमेश गोडे, तुषार गोडे, प्रमोद गोडे व गवळवाडी, दरी व परिसरातील १०० हुन अधिक तरुणांनी, ग्रामस्थांनी झाडांच्या फांद्यानी वणवा झोडपून आगीवर अखेर रात्री ११ वाजता नियंत्रण मिळवले.