Nashik MD Drug Case : सामनगाव येथील अमली पदार्थ प्रकरणातील संशयित अक्षय गणेश नाईकवाडे यास नाशिकच्या गुंडविरोधी पथकाने मध्य प्रदेशातील भोपाळ येथून ताब्यात घेतले.

त्यामुळे या गुन्ह्यातील महत्त्वाची माहिती पोलिसांना मिळण्याची शक्यता वर्तवली जात आहे. (Nashik MD Drug Case Drug mafia Akshay arrested from Bhopal news)

नाशिक रोड पोलिसांनी दोन महिन्यांपूर्वी सामनगाव येथील गणेश शर्मा यांच्याकडून अमली पदार्थ जप्त केले होते. त्यानंतर पथकाने सापळा रचून या गुन्ह्यात दहापेक्षा अधिक संशयितांची धरपकड केली. सोलापूर येथे उभारलेला कारखाना, गुदामही पोलिसांनी उद्‍ध्वस्त करत एमडी, कच्चा माल आदी यंत्रसामग्री असा कोट्यवधींचा मुद्देमाल पकडला.

या गुन्ह्याची व्याप्ती थेट पुण्यापर्यंत पोचलेली असताना नाशिकच्या पोलिसांनी भोपाळमधून मुख्य संशयितापैकी एक असलेल्या अक्षय नाईकवाडे यास ताब्यात घेतले. तीन महिन्यांपासून तो गुजरात, मध्य प्रदेश, राजस्थान, दिल्ली, उत्तराखंड या राज्यांमध्ये फिरत होता.

गुंडगिरीविरोधी पथकाचे प्रभारी पोलिस निरीक्षक ज्ञानेश्वर मोहिते यांना गुन्हे शाखेचे पोलिस उपायुक्त प्रशांत बच्छाव यांनी नाईकवाडे याला पकडण्याची सूचना केली.

त्यानुसार पथकातील अंमलदार प्रदीप ठाकरे यांनी नाईकवाडेचे भोपाळमधील लोकेशन शोधले. पोलिसांनी सापळा रचत शिताफीने त्याला ताब्यात घेतले. त्यास नाशिक रोड पोलिसांच्या ताब्यात दिले. पोलिस नाईक प्रदीप ठाकरे, अक्षय गांगुर्डे, गणेश भागवत यांच्या पथकाने ही कारवाई केली.