Nashik News : जागतिक दर्जाचे पाणथळ क्षेत्र असलेल्या नांदूरमधमेश्वर पक्षी अभयारण्याची देश विदेशातील पक्षांच्या आगमनाने सर्वदूर ख्याती आहे. निसर्गाच्या अभ्यासासाठी निसर्ग निर्वाचन केंद्राची निर्मिती झाली, पण सध्या या केंद्राची पुरती वाताहात झाली असून पक्षांसाठी बनवलेले निसर्ग निर्वाचन केंद्र आता गाईंचे कुरण बनले आहे. (Nandur Madhmeshwar Bird Sanctuary party nature constituency has become cow pasture)

नांदूर मधमेश्वर धरणाच्या पायथ्याशी असलेले खानगाव थडी शिवारातील हे केंद्र मोठा गाजावाजा करून आणि प्रचंड खर्च करून उभारण्यात आले. पर्यटकांना निसर्गाची, अभयारण्याची, सभोवताली आढळणाऱ्या पक्षी व प्राण्याची ओळख व्हावी. यासाठी स्थापन निसर्गनिर्वाचन केंद्रात अत्यंत महागडी अशी इलेक्ट्रॉनिक दृकश्राव्य ऑडिओ विज्युअल यंत्रणा बसविली होती.

गोदावरी नदीच्या काठावर अत्यंत निसर्गरम्य वातावरणात सुमारे दीड एकर क्षेत्रात पर्यटक निवास पशुपक्षी उपचार आणि पुनर्वसन केंद्र, बोटॅनिकल गार्डन अशा विविध सुविधा पर्यटकांना या ठिकाणी देण्यात येणार होत्या. मात्र हे सगळे काही वन विभागाच्या दुर्लक्षामुळे शून्य होऊन गेले आहे. तीन वर्षांपासून या केंद्राची संपूर्णपणे वाताहत झाली आहे. (latest marathi news)

उद्यानातील झाडांना उन्हाळ्यात पाणी दिले जात नव्हते. पावसाळ्यात पाणी मिळाल्याने झाडांची थोडीफार वाढ होईल अशी आशा होती मात्र या ठिकाणी काही पशुपालक आता खासगी गाईचे कळप चारायला सोडत असल्याने ही वन खात्याची बाग आहे की गुरांच्या चरण्याचे कुरण हा प्रश्न निर्माण झाला आहे. केंद्राची देखरेख करण्याची जबाबदारी ज्या कर्मचाऱ्यांकडे सोपवली आहे. त्यांना वेळ नाही.

केंद्राच्या इमारतीला सर्वत्र गळती लागली असून वीज आणि पाणीपुरवठ्याची बोंब झालेली आहे. सर्वत्र काटेरी झुडपांचे रान माजले आहे. सुरक्षारक्षकांना मोठ मोठ्या सापांचे दर्शन घडते. त्यांनाच जीवाची भीती निर्माण झाली आहे. संबधितांना अनेक महिन्यांपासून वेतनही मिळालेले नाही. गरीब आदिवासी कुटुंबाला वेतन कधी मिळणार याची प्रतिक्षा आहे.