एकलहरे : येथील एकलहरे रोडवरील किर्लोस्कर कंपनीजवळ एका युवकाचा धारदार हत्याराने खून झाल्याचे रविवारी (ता.१८) सकाळी उघडकीस आले. रस्त्याने कामावर जाणाऱ्यांच्या ही गोष्ट लक्षात आल्याने एका नागरिकाने पोलिसांना कळविले. पोलिस पथकाने येथे येऊन पाहणी व पंचनामा केला. (Dead body of young man)

खून झालेल्या तरुणाचे नाव चेतन ठमके असल्याचे नाशिक रोड पोलिसांनी सांगितले. रविवारी (ता.१८) सकाळी आठच्या सुमारास हा प्रकार उघडकीस आल्यानंतर पोलिस उपायुक्त मोनिका राऊत, सहाय्यक आयुक्त सचिन बारी, वरिष्ठ निरीक्षक रामदास शेळके व त्यांचे सहकारी तातडीने घटनास्थळी दाखल झाले.

खून झालेल्या ठमकेचे वय साधारण ३० ते ३५ असून तो विजय नगर, सिडको या भागातील आहे. त्याला या भागात कोणी आणले होते का, तो स्वतःच आला होता याबाबतही पोलिस शोध घेत आहेत. युवकाच्या अंगावर धारदार शस्त्राने गंभीर वार करण्यात आले आहेत. दरम्यान याप्रकरणी नाशिक रोड पोलिसांनी खुनाचा गुन्हा दाखल केला आहे. पुढील तपास वरिष्ठ पोलिस निरीक्षक रामदास शेळके यांचे मार्गदर्शनाखाली सुरू आहे.