नाशिक : ऊर्जा युवा प्रतिष्ठान व अश्वमेध करिअर ॲकॅडमीतर्फे आयोजित पोलिस भरती सराव परीक्षा व प्रशिक्षण शिबिरात नाशिक जिल्ह्यातील सुमारे हजारांहून अधिक विद्यार्थ्यांनी सहभाग नोंदवला. महाराष्ट्र सरकारमार्फत या वर्षी मोठ्या प्रमाणात सुमारे १७, ००० पदांची पोलिस भरती होत आहे.

या भरतीत नाशिकमधील जास्तीत- जास्त विद्यार्थी पास होऊन पोलिस भारती व्हावे, यासाठी प्रतिष्ठानचे अध्यक्ष व शिवसेना जिल्हाप्रमुख अजय बोरस्ते यांनी जिल्ह्यातील युवकांसाठी पोलिस भरती सराव परीक्षा व प्रशिक्षण शिबिराचे आयोजन केले. (Nashik Police Recruitment Practice Training by Urja Yuva Pratishthan marathi news)

केटीएचएम कॉलेज येथे आयोजित प्रशिक्षण शिबिराची सुरवात खासदार हेमंत गोडसे यांच्या हस्ते क्रिडा साहित्याचे पूजन करून करण्यात आली. याप्रसंगी प्रतिष्ठानचे अध्यक्ष अजय बोरस्ते, केटीएचएम कॉलेजचे प्राचार्य श्री. दरेकर, अश्वमेध करिअर ॲकॅडमीचे संचालक मनीष बोरस्ते, लोकसभा संघटक योगेश म्हस्के, उपजिल्हाप्रमुख शशिकांत कोठुळे, युवासेना लोकसभा विस्तारक योगेश बेलदार, विधानसभाप्रमुख रोशन शिंदे, उपमहानगरप्रमुख आनंद फरताळे, युवासेना जिल्हा चिटणीस आदित्य बोरस्ते, महिला आघाडी सहसंपर्कप्रमुख सुवर्णा मटाले, महानगरप्रमुख अस्मिता देशमाने आदी उपस्थित होते. (Latest Marathi News)

खासदार हेमंत गोडसे यांनी शिबिरात भाग घेणाऱ्या विद्यार्थ्यांना येणाऱ्या भरतीत नक्कीच फायदा होईल व जिल्ह्यातील जास्तीत- जास्त विद्यार्थी भरती होतील यासाठी विद्यार्थ्यांना शुभेच्छा दिल्या. अजय बोरस्ते यांच्या प्रतिष्ठानच्या माध्यमातून आजवर राबविलेले सर्वच उपक्रम हे वेगळे असल्याने विद्यार्थ्यांना व नाशिककरांना नेहमी फायदाच झाला असल्याचे सांगितले.

रविवारी (ता.१०) शिबिरात विद्यार्थ्यांच्या कागदपत्रांची तपासणी करून त्यातील कोणकोणते कागदपत्रांची कमतरता आहे, याविषयी मार्गदर्शन करण्यात आले. विद्यार्थ्यांची उंची मोजून मुलांसाठी १६०० व मुलींसाठी ८०० मीटर रनिंग व गोळाफेक चाचणी घेण्यात आली. शारीरिक चाचणीत जास्तीत- जास्त गुण कसे मिळवता येईल यासाठी क्रिडा शिक्षकांनी मार्गदर्शन केले. दुपार सत्रात लेखी परीक्षा घेण्यात आली.