Nashik News : पावसाचा मनमुराद आनंद घेण्याचे दिवस असताना नाशिककरांना ऐन जूनमध्ये प्रखर सूर्यकिरणांचा सामना करावा लागत आहे. पावसाने ओढ दिल्‍याने पाऱ्यातही वाढ झाली आहे. एकूणच पाऊस लांबल्‍याने नाशिककर चिंतातूर झाले आहेत. मेमध्ये मॉन्‍सूनपूर्व पाऊस झाल्‍याने उन्‍हाळ्यापासून नागरिकांना काही प्रमाणात दिलासा मिळाला होता. (people worried due to prolonged rain)

परंतु बहुतांश वेळा तापमान वाढीमुळे नागरिकांना उकाड्याचा सामना करावा लागत होता. जूनला सुरवात झाल्‍यानंतर आता मॉन्‍सून सरी दिलासादायक ठरतील, अशी अपेक्षा नाशिककरांना होती. मात्र जून संपत आलेला असताना तुरळक स्वरूपातच पाऊस झाल्‍याने नागरिकांचा हिरमोड झाला.

पावसाने ओढ दिलेली असताना, दुसरीकडे दिवसभर प्रखर सूर्यकिरणांमुळे उकाड्यात भर पडत आहे. शनिवारी (ता. २२) नाशिकचे कमाल तापमान ३३ अंश सेल्सिअस नोंदविले आहे. आणखी काही दिवस पाऊस लांबल्‍यास नागरिकांना पाणीकपातीचा सामना करावा लागणार असल्याने त्‍यांच्‍या चिंतेत आणखी भर पडणार आहे. त्‍यामुळे नाशिककांचे डोळे आकाशाकडे लागले आहेत. (latest marathi news)

दोन दिवसांत साडेचार अंशांची वाढ

पावसाचा शिरकाव झाल्‍याने दोन दिवसांपूर्वी पाऱ्यात घसरण झालेली होती. गुरुवारी (ता.२०) नाशिकचे कमाल तापमान २८.४ अंश सेल्सिअस नोंदविले होते.

मात्र त्‍यानंतर पावसाने दडी दिल्‍याने अवघ्या दोन दिवसांत पाऱ्यात तब्‍बल साडेचार अंश सेल्सिअसची वाढ झाली आहे. त्‍यामुळे शनिवारी (ता. २२) नाशिकचे कमाल तापमान ३३ अंश सेल्सिअस नोंदविले गेले.