Nashik ST Bus Accident : नाशिकच्या सप्तशृंगी गड घाटात एसटी बसला भीषण अपघात झाला आहे. या अपघातात एका महिलेचा मृत्यू झाला असून अनेक प्रवाशी जखमी झाले आहेत. या अपघातातील जखमींना जवळच्या शासकीय रुग्णालयात उपचारासाठी दाखल करण्यात आले आहे. यानंतर आता एसटी बसमधील वाहकाचा व्हिडीओ समोर आला आहे.

दरम्यान या अपघातानंतर बसच्या वाहकांने अपघात कसा झाला याबद्दल माहिती दिली आहे. अपघातग्रस्त बस ही खामगाव डेपोची मुक्कामी बस असून त्यात २४ प्रवासी प्रवास करीत होते. दरम्यान बसला गणपती पॉइंट जवळ वणी गड उतरत असतांना हा अपघात झाला.

कंडक्टरने काय सांगितलं...

गाडी मुकामाला होती.रात्री जेवण करून झोप वगैरे व्यवस्थित झाली. सकाळी साडेसहा वाजता बस स्टॉपवरून निघालो. पण दहा बारा मिनीटानंतर गणपती पाँइट येथे धुकं भयानक होतं. त्या धुक्यामुळं वळण चालकाच्या लक्षात आलं नसावं असं वाटतं अशी माहिती बसमधील वाहकाने दिली आहे. तसेच त्यांनी अंदाजे २२ ते २३ प्रवासी होते असेही सांगितले.

रुग्णांवर उपचार सुरू

मिळालेल्या माहितीनुसार या एसटी बसमध्ये एकूण प्रवासी २४ (चालक व कंडक्टर सह) प्रवास करत होते. यापैकी १ मयत (महिला-अशाबाई राजेंद्र पाटील, मुडी ता अंमळनेर) ०६ रुग्ण वणी शासकीय रुग्णालयात उपचार घेत आहेत. तर १७ रुग्ण नाशिक येथे शासकीय रुग्णालयात उपचारासाठी शिफ्ट केले आहेत.