Nashik Lok Sabha Constituency : नाशिक लोकसभा मतदारसंघात शांतीगिरी महाराज यांच्यानंतर त्र्यंबकेश्‍वरचे सिध्देश्‍वरानंद गुरुस्वामी सोमेश्‍वरानंद सरस्वतींनी अपक्ष उमेदवारी अर्ज दाखल केला. त्यांच्याकडे सोन्याचा मुलामा असलेले पावणे तीन लाखांचे घड्याळ असून तब्बल दीड कोटींची संपत्ती असल्याची माहिती त्यांनी प्रतिज्ञापत्राद्वारे निवडणूक आयोगाला दिली आहे. ( Siddheshwaranand Guruswami Someshwaranand Saraswati of Trimbakeshwar filed his independent candidature )

उमेदवारी अर्ज भरण्याच्या तिसऱ्या दिवशी (मंगळवारी ता.३०) नाशिक लोकसभेसाठी तीन उमेदवारांनी अर्ज सादर केले. यात सिध्देश्‍वरानंद सरस्वती व जितेंद्र नरेश भाभे यांनी अपक्ष उमेदवारी केली आहे. कमलाकर बाळासाहेब गायकवाड यांनी दलित शोषित पिछडा वर्ग अधिकार दलातर्फे आपला अर्ज सादर केला. यात सिध्देश्‍वरानंद महाराजांनी प्रतिज्ञापत्राद्वारे आपल्या संपत्तीचे विवरण सादर केले.

त्यानुसार महाराजांकडे २४ लाख ८१ हजारांची रोख रक्कम असून, पावणे दोन लाखांच्या ठेवी विविध बँकांमध्ये त्यांच्या नावे आहेत. ४५ हजारांचे शेअर्स महाराजांनी खरेदी केले आहेत. टेम्पो, जेसीबी, बस आदी प्रकरांची २२ लाखांची वाहने त्यांच्याकडे आहेत. एवढी सगळी संपत्ती असताना महाराजांवर ९५ लाख ९५ हजार रुपयांचे कर्जही डोक्यावर आहे. विशेष म्हणजे, सिध्देश्‍वरानंद महाराजांकडे साडेचार लाखांचे (५५ ग्रॅम) सोने असून, पावणे तीन लाखाचे सोन्याचा मुलामा असलेले घड्याळ ते वापरतात.  (Nashik Political News)

महाराजांकडे एकूण एक कोटी २५ लाखांची जंगम मालमत्ता आहे. तर वीस लाख ८४ हजारांची स्थावर मालमत्ता आहे. यातील वीस लाख ८४ हजारांची मालमत्ता त्यांनी स्वत: खरेदी केल्याचे महाराजांची म्हटले आहे. नाशिकमधील दुसरे उमेदवार जितेंद्र भाभे यांचा निर्भय महाराष्ट्र पक्ष असला तरी नोंदणीकृत पक्ष नसल्यामुळे त्यांचा अर्ज अपक्ष गृहित धरला जात आहे. भाभे यांच्याकडे २५ हजार रुपये रोख, पंधरा हजारांच्या ठेवी, साडेतीन तोळे सोने व दहा लाखांची गाडी असल्याची माहिती त्यांनी प्रतिज्ञापत्रातून दिली आहे.

३५ लाखांचे घर त्यांच्या नावावर असले तरी ४० लाखांचे कर्जही डोक्यावर आहे. त्यांची एकूण जंगम मालमत्ता दहा लाख ७० हजारांची तर स्थावर मालमत्ता १५ लाखांची आहे. कमलाकर गायकवाड यांच्याकडे सव्वाचार लाखांची जंगम मालमत्ता तर २२ लाख ६९ हजारांची स्थावर मालमत्ता आहे. तीन लाख दहा हजारांचे कर्जही त्यांनी घेतल्याचे प्रतिज्ञापत्रात नमूद केले आहे.

आता महायुतीच्या अर्जांकडे लक्ष

लोकसभा निवडणुकीत अर्ज सादर करण्यासाठी उमेदवारांना आता अवघे दोन दिवस शिल्लक राहिले आहेत. गुरुवार (ता.२) व शुक्रवार (ता.३) या दिवशी उमेदवारी अर्ज सादर करावे लागतील. त्यामुळे महायुतीच्या उमेदवारांच्या शक्तीप्रदर्शनाविषयी नाशिककरांना कमालीची उत्सुकता लागून आहे.