Nashik News : पेट्रोल- डिझेलच्या वाढत्या किमती तर दुसरीकडे विजेचा वाढता दरामुळे इंधनावर चालणारे वाहन असो वा इलेक्ट्रिकल वाहन वापरणे सर्व सामान्यांना परवडणारे नाही. पण नाशिकमधील एका अवलियाने चक्क सोलर पॅनेलवर मोपेड वाहन चालविण्याचा यशस्वी प्रयोग केला आहे. एका शंभर वॅटच्या पॅनेलवर मोपेड तब्बल ८० किमी धावते, असा त्याने दावा केला आहे. ()

असे असले तरी सोलर पॅनेलवर धावणारे हे मोपेड वाहन नाशिकच्या रस्त्यावर धावताना अनेकांचे लक्ष वेधून घेते आहे. मूळचे नाशिककर असलेले जावेद शेख हे बडोदा येथील स्नायडर कंपनीतून सेवानिवृत्त झाले आहेत. इलेक्ट्रिकल इंजिनिअर असलेले जावेद यांना पाच वर्षांपूर्वी सोलर पॅनेलवर बाईक चालविण्याची कल्पना सुचली.

याच कल्पनेच्या आधारे ते पाच वर्षांपासून मोपेड बाईकवर प्रयोग करीत होते. अखेर सहा महिन्यांपूर्वी त्यांच्या सोलर दुचाकीच्या कल्पनेला प्रत्यक्षात मूर्तस्वरूप आले. आजघडीला मोपेडच्या चारीही बाजूने अँगल लावले आणि त्यावर १०० वॅटचे सोलर पॅनेल बसविले. (latest marathi news)

अशी आहे सोलर बाईक

जावेद यांनी त्यांच्या मोपेडला १०० वॅटचे सोलर पॅनेल जोडले आहे. सोलरच्या माध्यमातून बाईकची बॅटरी चार्ज होते. यामुळे ही बाईक तब्बल ८० ते ११० किलोमीटर अंतर धावू शकते, असा त्यांचा दावा आहे. यासाठी जावेद यांनी सिंक्रोनायझेशन सर्किटचा वापर केला असून, हे सर्किट सोलर आणि इलेक्ट्रिक या दोन्ही पर्यायांनुसार बॅटरी चार्ज करते.

उन्हामध्ये मोपेड उभी असेल तरीही सोलरमुळे बॅटरी चार्ज होण्याची प्रक्रिया सुरूच असते. सोलर पॅनेल, सर्किट, मॅकनिकल ॲडजेस्टमेंट व डॅमप्रु ब्रॅकेट असे महत्त्वाचे साहित्य वापरण्यात आले आहे. यासाठी जावेद यांना अवघा २५ हजारांचा खर्च आला आहे.

''इंधन आणि इलेक्ट्रिकच्या तुलनेमध्ये सोलर पॅनेल संकल्पनेनुसार बनविलेली ही बाईक किफायतशीर असल्याचे वाटते. सध्या प्रायोगिक स्वरूपात वापरताना येणाऱ्या समस्यांनुसार त्यात बदल करतो आहे.''- जावेद शेख, पखाल रोड, नाशिक.