नामपूर : येथील तरुण शेतकऱ्याने तीन वर्षांपासूनची नापिकी, पिकविम्याच्या नावाखाली खासगी बँकांकडून होणारी लूट, शेतमालाचे कोसळलेले भाव, शेतमालाचे नुकसान, शेतीमधून अपेक्षित उत्पन्न न मिळाल्याने नैराश्याला कंटाळून विषारी औषध सेवन करीत जीवनयात्रा संपविली. मयूर विनायक खरोटे (पोतदार) (वय ४२) असे आत्महत्याग्रस्त शेतकऱ्याचे नाव आहे.

सटाणा रस्त्यालगत मयूर फर्निचर मॉलसमोर सामाजिक कार्यकर्ते विनायक खरोटे यांची सुमारे पाच एकर सामाईक शेती आहे. त्यांना मयूर व गणेश अशी दोन मुले. दोन्ही मुलांचे विवाह झाल्यानंतर त्यांनी दोघांना सारखी शेती वाटप करून दिली. त्यानुसार अनेक वर्षांपासून मयूर खरोटे पूर्णपणे शेती पाहत होते. दोन- तीन वर्षांपासून द्राक्षाला भाव नसल्याने शेतीत मोठ्या प्रमाणात आर्थिक नुकसान झाले. एका खासगी कंपनीच्या माध्यमातून त्यांनी पीकविमाही काढला होता. परंतु, अवकाळी पावसामुळे द्राक्षबागेचे नुकसान होवूनही खरोटे कुटुंबाला नुकसानभरपाई मिळाली नाही. त्यामुळे त्यांच्या परिवाराची आर्थिक घडी विस्कटली.

खरोटे कुटुंबीयांवर आयसीआयसीआय बँकेचे सुमारे साडेदहा लाख रुपयांचे कर्ज आहे. तसेच, यंदाही हंगामात डाळिंबाच्या पिकासाठी मोठ्या प्रमाणात खर्च करूनही अपेक्षित उत्पन्न न मिळाल्याने त्यांना मोठा आर्थिक फटका बसला. त्यामुळे शनिवारी (ता. ९) दुपारी दोनच्या सुमारास त्यांनी आत्महत्या केली.जायखेडा पोलिस ठाण्यात आकस्मिक मृत्युची नोंद करण्यात आली आहे.