नाशिक रोड : नाशिक विभाग शिक्षक मतदारसंघाचा उमेदवार हा शिक्षकच असायला हवा, असा सूर नाशिक शिक्षक लोकशाही आघाडीच्या बैठकीत उमटला. पुणे येथे झालेल्या बैठकीत नाशिक आणि मुंबई विभागाच्या शिक्षक मतदारसंघाच्या उमेदवारांबाबत चर्चा झाली. (nashik Teachers Constituency Election candidate must be teacher decision division TDF meeting marathi news)

नाशिक विभाग तसेच मुंबई विभाग शिक्षक मतदारसंघाच्या निवडणुकीच्या पार्श्वभूमीवर महाराष्ट्र राज्य शिक्षक लोकशाही आघाडीच्या राज्य कार्यकारिणीची सहविचार सभा आझम कॅम्पस, पुणे येथे राज्याचे अध्यक्ष आमदार नानासाहेब बोरस्ते यांच्या अध्यक्षतेखाली झाली.

सभेची सुरवात नाशिक विभागाचे ‘टीडीएफ’चे अध्यक्ष बादशाह शेख यांना श्रद्धांजली वाहून तसेच आजम कॅम्पसच्या वतीने राज्याचे अध्यक्ष नानासाहेब बोरस्ते यांचा राज मुजावर यांच्या हस्ते पुष्पगुच्छ देऊन सन्मान करण्यात आली. सभेच्या सुरवातीलाच शिक्षक लोकशाही आघाडीचे महासचिव हिरालाल पगडाल यांनी मागील सभेचे इतिवृत्त वाचून सर्वांच्या सहमतीने कायम केले.

या सभेत प्रामुख्याने नाशिक विभाग व मुंबई विभाग शिक्षक मतदारसंघाच्या निवडणुकीबाबत तसेच उमेदवारीबाबत चर्चा झाली. दोन्ही विभागांमध्ये उमेदवार हा शिक्षकच असावा, असे एकमताने ठरविण्यात आले. प्रामुख्याने नाशिक विभागातील जळगाव, धुळे, नंदुरबार, अहमदनगर व नाशिक जिल्ह्यांतील जिल्हा पदाधिकाऱ्यांनी आपल्या जिल्ह्यातील विविध शैक्षणिक समस्या तसेच जिल्हा निवडणुकीचा आढावा राज्य कार्यकारिणीसमोर मांडला.

राज्याचे कार्याध्यक्ष जी. के. थोरात, विश्वस्त के. एस. ढोमसे यांनी रत्नागिरी येथे झालेल्या बैठकीचा इतिवृत्तात सभेपुढे मांडून येणाऱ्या काळामध्ये संघटना बांधणीसाठी योग्य निर्णय घेण्याची गरज असल्याचे मत व्यक्त केले. तसेच राज्यातील इतर पदाधिकाऱ्यांनी चर्चेमध्ये सहभाग घेऊन आपले मत व्यक्त केले.

डॉ. एन. डी. नांद्रे, राज्य सहसचिव, आर. एच. बाविस्कर (जळगाव), निशांत रंधे (धुळे), संदीप घोरपडे (अमळनेर), सुरेश पाटील (संगमनेर), अरविंद कडलक, नरेंद्र पाटील (नंदुरबार), संजय पवार (नाशिक), राजेंद्र लांडे, आबासाहेब कोकाटे (अहमदनगर), राज्य संघटनेचे राज्य कार्यकारणी सदस्य, विभाग अध्यक्ष व सचिव मोठ्या संख्येने उपस्थित होते.