Nashik Traffic Police : वाहतूक नियमांचे उल्लंघन करणार्या बेशिस्त वाहनचालकांविरोधात दंडात्मक कारवाई करताना शहर वाहतूक पोलिसांकडून इ-चलन मशिनऐवजी मोबाईलचा वापर केला जात असल्याचे वृत्त ‘दैनिक सकाळ’मधून प्रसिद्ध झाले होते. या वृत्ताची गंभीर दखल घेत वरिष्ठ अधिकार्यांनी वाहतूक पोलिसांना दंडात्मक कारवाईसाठी इ-चलन मशिनचाच वापर करण्याचे आदेश दिले. (Nashik Traffic Police Take action through e challan machine marathi news)

त्यानुसार, आता वाहतूक पोलिसांच्या हाती इ-चलन मशिन दिसू लागले आहेत. राज्य महामार्ग वाहतूक विभागाचा ‘वन नेशन - वन चलन’ हा पायलट प्रोजेक्ट नाशिक शहरात राबविला जात आहे. त्यानुसार, शहर पोलिसांच्या हाती बेशिस्त वाहनचालकांविरोधात दंडात्मक कारवाई करण्यासाठी आधुनिक स्वरुपाचे इ-चलन मशिन देण्यात आलेले आहे.

परंतु या मशिनमध्ये असलेल्या काही त्रुटींमुळे ते प्रत्यक्ष कामकाजावेळी वाहतूक पोलिसांना अडचणीचे ठरत होते. त्यामुळे वाहतूक पोलिसांनी इ-चलन मशिनऐवजी मोबाईलचा वापर बेशिस्त वाहनचालकांचे फोटो काढण्यासाठी केला. यासंदर्भातील छायाचित्रांसह बातमी ‘दैनिक सकाळ’मधून गेल्या आठवड्यात (ता. २३) प्रसिद्‌ध झाली होती. (latest marathi news)

या बातमीची शहर वाहतूक शाखेचे उपायुक्त चंद्रकांत खांडवी यांनी गांभीर्याने दखल घेत वाहतूक शाखेच्या अंमलदारांची बैठक घेतली. या बैठकीमध्ये वाहतूक पोलिसांनी बेशिस्त वाहनचालकांविरोधात कारवाई करताना मोबाईल न वापरण्याची ताकीद देतानाच, इ-चलन मशिनचाच वापर करावा असे आदेश दिले होते. तसेच, इ-चलन मशिनसंदर्भात असलेल्या त्रुटी या संबंधित कंपनीच्या निदर्शनास आणून दिल्या आहेत.

त्यासंदर्भात पाठपुरावाही शहर वाहतूक शाखेकडून केला जात आहे. वाहतूक शाखेच्या उपायुक्तांच्या या आदेशामुळे शहरात ठिकठिकाणी बेशिस्त वाहनचालकांविरोधात कारवाई करणार्या वाहतूक अंमलदारांच्या हाती मोबाईल नव्हे तर इ-चलन मशिन दिसू लागले आहेत. चौका-चौकात वाहतूक नियमांचे उल्लंघन करणार्या वाहनचालकांविरोधात वाहतूक पोलीस इ-चलन मशिनद्वारेच दंडात्मक कारवाई केली जात आहे.

''कोणत्याही परिस्थितीमध्ये वाहतूक अंमलदारांनी बेशिस्त वाहनचालकांविरोधात दंडात्मक कारवाई करताना इ-चलन मशिनचाच वापर करण्याचे आदेश दिले आहेत. त्यानुसार अंमलबजावणीही सुरू झाली आहे.''- चंद्रकांत खांडवी, पोलीस उपायुक्त, शहर वाहतूक शाखा.