Maratha Kunbi Record : जिल्ह्यात मराठा- कुणबी व कुणबी-मराठा जातीच्या सापडलेल्या दोन लाख नोंदींपैकी एक लाख ७२ हजार नोंदीचे स्कॅनिंग आणि अपलोडिंग पूर्ण झाले आहे. उर्वरित नोंदी पुढील आठवडाभरात अपलोड करण्याचे आदेश माजी न्यायमूर्ती संदीप शिंदे यांच्या समितीने मंगळवारी जिल्हा प्रशासनाला दिले आहेत. ()

ऑक्टोबर, नोव्हेंबर २०२३ मध्ये विविध सरकारी यंत्रणांच्या मदतीने मराठा-कुणबी व कुणबी-मराठा जातीच्या नोंदी शोधण्याची मोहीम जिल्ह्यात राबविण्यात आली. जिल्हाभरात एक कोटी ७२ लाख नोंदी तपासण्यात आल्या. त्यापैकी एक लाख ९९ हजार ५४ म्हणजेच जवळपास दोन लाख नोंदी कुणबीच्या आढळल्या.

जिल्हाधिकारी जलज शर्मा यांनी नेमलेल्या समितीने गावापासून शहरापर्यंत सर्व स्तरावर विविध सरकारी यंत्रणांद्वारे नोंदी शोधल्या. जन्म - मृत्यू नोंदी, शैक्षणिक अभिलेख, महापालिका, नगरपालिकांमधील नोंदी, महसूली अभिलेख, १९६७ पूर्वीचे सेवा पुस्तक, मुद्रांक जिल्हाधिकारी, भूमी अभिलेख विभाग, कारागृह अधीक्षक, पोलिस विभागाकडील नोंदी तपासण्यात आल्या.

सापडलेल्या कुणबीच्या नोंदींचे स्कॅनिंग करून त्या ड्राईव्हवर अपलोड करण्याचे निर्देश सरकारने दिले होते. या कामाचा आढावा शिंदे समितीने मंगळवारी (ता. २०) व्हिडिओ कॉन्फरन्सिंगद्वारे घेतला. जिल्हाधिकारी शर्मा, निवासी उपजिल्हाधिकारी राजेंद्र वाघ बैठकीला उपस्थित होते.

आढळलेल्या नोंदी हा महत्त्वाचा दस्तऐवज असून त्यासाठी अधिकारी, कर्मचाऱ्यांनी प्रचंड मेहनत घेतली आहे. त्यामुळेच नोंदीचे रेकॉर्ड जतन करून ठेवण्याकरिता ही सर्व कागदपत्रे स्कॅन करून एका ड्राईव्हमध्ये ठेवण्यात येत आहेत. ( latest marathi news )