जळगाव : अनुसूचित जमातीतील कोळी समाजाला जातीचे व वैधता प्रमाणपत्र सुलभ पद्धतीने मिळावे, यासाठी १६ जूनला सकाळी ११ वाजता जळगाव जिल्हाधिकारी कार्यालयासमोर आंदोलन केले जाणार आहे, अशी माहिती प्रल्हाद सोनवणे यांनी दिली. जळगावात २०२३ मध्ये याच विषयावर अन्नत्याग आंदोलन झाले होते. त्यानंतर मुंबईतील सह्याद्री अतिथीगृहात शासकीय बैठक होऊन इतिवृत्त प्रसिद्ध झाले; मात्र अद्याप त्याची अंमलबजावणी न झाल्याने समाजात तीव्र नाराजी आहे. या पार्श्वभूमीवर कोळी महासंघाचे राष्ट्रीय अध्यक्ष रमेश पाटील यांच्या नेतृत्वाखालील शिष्टमंडळाने मुख्यमंत्र्यांची भेट घेऊन त्यांना स्मरणपत्रही दिले आहे. मागण्या मान्य न झाल्यास आंदोलनाचा इशारा समाजाने दिला आहे.
