सोग्रस : सध्या अनेक ठिकाणी दुष्काळाची दाहकता जाणवू लागली आहे. मुक्या जनावरांना त्याचा सर्वाधिक फटका बसू पाहत आहे. अन्न-पाण्याच्या शोधात भटकंती सुरु असताना एकमेकांमध्ये झुंजणारी दोन काळविटे ठिबक सिंचनाच्या नळीत अडकल्याची घटना चांदवड तालुक्यातील कातरवाडी येथे घडली. (Nashik water scarcity Blackbuck tied with drip tubes Incident in Chandwad Katarwadi marathi news)

चांदवड तालुक्यात यंदा लवकर पाणीटंचाईचा प्रश्‍न आ वासून उभा आहे. मानवी घटकांसोबत पशु-पक्ष्यांनाही दुष्काळी परिस्थितीचा फटका बसत आहे. कातरवाडी शिवारात अन्न-पाण्याच्या शोधात फिरत असताना शेतकरी गणेश झाल्टे यांच्या शेतात दोन काळवीटांमध्ये झुंज सुरु झाली.

बघताबघता दोन्ही काळवीटे कांदा पिकाला पाणी देण्यासाठी तयार केलेल्या ठिबक सिंचनाच्या नळ्यांमध्ये अडकली. झुंज इतकी जोरात होती की ठिबकच्या नळ्या काळवीटांच्या शिंगात व गळ्यामध्ये अडकल्या अन्‌ चांगलीच फजिती झाली. घटनेची माहिती मिळताच येवला वनपरिक्षेत्राचे पथक घटनास्थळी दाखल झाले. (Latest Marathi News)

शेतकऱ्यांच्या मदतीने कर्मचाऱ्यांनी काळवीटांच्या शिंगात व गळ्यात अडकलेल्या नळ्या काढण्याचे प्रयत्न सुरु झाले. अथक प्रयत्नांनंतर काळविटांची सुटका करण्या वनविभागाला यश आले. दरम्यान, या सर्व प्रकारामुळे झाल्टे यांच्या कांदा व ठिबकच्या साहित्याचे नुकसान झाले.

"पाणीटंचाई निर्माण झाल्यामुळे वन्यप्राणी आता मानवी वस्त्यांकडे धाव घेत आहे. त्यामुळे थोड्याफार पाण्यावर घेतलेल्या पिकांचे नुकसान होत आहे. वन्यप्राण्यांसाठी वनविभागाने ठिकठिकाणी पाणवठे तयार केल्यास नुकसान टळेल."- गणेश झाल्टे, शेतकरी, कातरगाव