देवळा : देवळा तालुक्याच्या पूर्व भागात आता दुष्काळाच्या झळांनी जनजीवन विस्कळीत झाले आहे. यावर्षी ना खरीप हंगाम आला ना रब्बी हंगाम! त्यामुळे कोणतेच उत्पादन न आल्याने दुष्काळाची तीव्रता या आधीच्या दुष्काळाच्या मानाने अधिक आहे. या परिस्थितीमुळे खिशातला पैसा संपल्याने नाईलाजास्तव घरातील थोडेफार सोन्याचे दागिने तारण ठेवत वा मोडत पैसा उभा करण्यासाठी शेतकऱ्यांची वणवण सुरू आहे. (Nashik Farmers fighting to save livestock in deola news)

बँकांमध्ये सोने गहाण ठेवण्याकडे शेतकऱ्यांचा जास्त कल आहे. राष्ट्रीयकृत आणि सहकारी बँकांनाही सोने तारण योजना सुरू करीत व्याजदर परवडणारे ठेवले आहेत. खासगी सावकारांच्या तुलनेत बँकांचे वा आर्थिक संस्थांचे वार्षिक व्याजदर ९ ते १२ टक्क्यांच्या दरम्यान आहेत.

जवळील सोने मोडले तर ते पुन्हा खरेदी करणे शक्य नाही अशी भावना असल्याने सोने तारण ठेवून पैसा उभारण्याकडे लोकांची पसंती आहे. काही नागरी बँका तसेच पतसंस्थांच्याशी चर्चा केली असता सध्या सोने तारण ठेवत कर्ज घेणाऱ्यांची संख्या वाढली असून, यात शेतकऱ्यांची संख्या अधिक आहे. काही शेतकरी तर अक्षरशः चार-पाच ग्रॅम सोन्याचे दागिने आणत त्यावर कर्ज मागतात. त्यावेळी शेतकऱ्यांची आर्थिक अवस्था किती बिकट आहे, हे लक्षात येते. (latest marathi news)

ग्रामीण भागात जिल्हा बँक आणि सोसायटींच्या माध्यमातून सहज कर्जपुरवठा केला जात असे. मात्र, आता तेथेही मर्यादा पडत असल्याने शेतकऱ्यांना पैसा उभा करणे अवघड झाले आहे. लग्नसराई, सणवार, आजारपण अशा अनेक बाबींसाठी पावलागणिक पैसा लागत आहे. याशिवाय शैक्षणिक वर्ष सुरू होणार असल्याने मुलांच्या शिक्षणासाठी आर्थिक जुळवाजुळव करावी लागणार आहे.

"शेतकरी दाम्पत्य सोने तारण ठेवतात तेव्हा त्यांच्या मनाची घालमेल होत असली तरी पैशांची निकड मोठी असते. अशा वेळी आम्ही कमीतकमी वेळेत शेतकऱ्यांना सुरक्षिततेची हमी देत सोने तारणावर कर्ज उपलब्ध करून देतो. सध्या तर दिवसाला १५-२० सोने तारण कर्ज प्रकरणे होतात."- नितीन बोरसे, व्यवस्थापक, देवळा मर्चंट्स को. ऑप. बँक