Nashik News : जिल्हा परिषदेच्या सुपर फिफ्टी उपक्रमात विद्यार्थी चमकत असताना प्राथमिक शिक्षण विभागांतर्गत शिष्यवृत्ती परीक्षेत जिल्ह्याची कामगिरी फारशी समाधानकारक राहिलेली नाही. त्यामुळे शिष्यवृत्ती परीक्षेत विद्यार्थ्यांचा टक्का वाढविण्यासाठी प्राथमिक शिक्षण विभाग आतापासूनच सरसावला आहे. (ZP Education Department working to increase percentage of scholarship)

विभागातर्फे दर महिन्याला सराव परीक्षा घेऊन विद्यार्थ्यांची तयारी करून घेतली जाणार असल्याची माहिती शिक्षणाधिकारी नितीन बच्छाव यांनी दिली. महाराष्ट्र राज्य परीक्षा परिषदेच्या वतीने झालेल्या पूर्व माध्यमिक आणि माध्यमिक शिष्यवृत्ती परीक्षेच्या राज्यस्तरीय गुणवत्ता यादीसाठीची परीक्षा ही यंदा १८ फेब्रुवारीला झाली होती.

परीक्षेचा निकाल जाहीर झाला आहे. या परीक्षेमध्ये नाशिक जिल्ह्यातील आठ विद्यार्थी राज्याच्या शिष्यवृत्ती गुणवत्ता यादीत झळकले आहेत. त्यात पाचवीच्या राज्य बोर्डाच्या ग्रामीण विभागाचे तीन तसेच आठवीच्या सीबीएसई-आयसीएसई विभागाच्या आठवीतील तीन विद्यार्थ्यांचा समावेश आहे. राज्य बोर्डाच्या शहरी विभागातून पाचवीचा एकही विद्यार्थी राज्याच्या गुणवत्ता यादीत झळकलेला नाही.

इतर जिल्ह्याच्या तुलनेत नाशिक जिल्ह्यातील शिष्यवृत्ती परीक्षेतील विद्यार्थ्यांची टक्केवारी कमी आहे. त्यामुळे या शिष्यवृत्ती परीक्षेत विद्यार्थ्यांचा टक्का वाढविण्यासाठी शिक्षण विभागाने नियोजन केले आहे. गतवर्षी परीक्षेच्या पूर्वसंध्येला केवळ एकदाच सराव परीक्षा घेण्यात आली होती. (latest marathi news)

यंदा मात्र दर महिन्याला शाळांमध्ये सराव परीक्षा घेण्याचे निश्‍चित केले आहे. त्याकरिता शिष्यवृत्ती परीक्षेला बसणाऱ्या विद्यार्थ्यांची यादी तयारी केली जात आहे. ही यादी निश्चित झाल्यानंतर विद्यार्थ्यांची सराव परीक्षा घेतली जाईल. या परीक्षेत कमी गुण प्राप्त विद्यार्थ्यांचे शाळा सुटल्यानंतर शिक्षक जादा तास घेतील.

या माध्यमातून विद्यार्थ्यांचा जास्तीत जास्त सराव करून घेतला जाणार आहे. याशिवाय विशेष तज्ज्ञ शिक्षकांचेही मार्गदर्शन दिले जाणार आहे. याबाबत सर्व शिक्षकांची बैठक घेतली जाणार असल्याचे शिक्षणाधिकारी बच्छाव यांनी सांगितले.