नाशिक : मागील दोन वर्षांपासून पुष्पोत्सवाची खंडित झालेली परंपरा यंदा नियमित होणार आहे. मार्चच्या पहिल्या आठवड्यात पुष्पोत्सवाचे आयोजन करण्यास स्थायी समितीने हिरवा कंदील दाखविला.

महापालिकेकडून १९९३ मध्ये पुष्पोत्सव भरविण्याची परंपरा सुरू करण्यात आली. २००८ पर्यंत पुष्पोत्सव आयोजित केला जात होता. मात्र उद्यान विभागातील कथित टेंडर घोटाळ्यामुळे पुष्पोत्सव साजरा करण्याची परंपरा खंडित झाली. (NMC Flower Festival Pushpotsav project gets green light nashik)

२०१९ मध्ये महापालिकेचे तत्कालीन आयुक्त राधाकृष्ण गमे यांनी पुष्पोत्सव साजरा करण्यास सुरवात केली. दोन वर्ष पुष्पोत्सव भरविला गेला. परंतु कोरोनामुळे दोन वर्षाच्या आयोजनावर निर्बंध आले.

कोरोना संकट दूर झाल्यामुळे आता उद्यान विभागाने पुन्हा पुष्पोत्सव आयोजित करण्याची तयारी सुरू केली आहे. फेब्रुवारीच्या शेवटच्या आठवड्यात किंवा मार्चच्या पहिल्या आठवड्यात पुष्पोत्सव भरविला जाईल.

स्थायी समितीने खर्चाला मान्यता दिली आहे. पुष्पोत्सवांतर्गत विविध स्पर्धा आयोजित केल्या जाणार आहे.

गुलाबपुष्पे, कृत्रिम आच्छादनात वाढविलेले गुलाबपुष्पे, मोसमी व वर्षा फुले, कुंडीतील, शोभिवंत वनस्पती, पुष्परचना, कुंड्यांची सजावट अशा विविध गटात स्पर्धा घेतल्या जाणार आहेत.