नाशिक : कोरोनाबाधितांच्‍या (Corona patients) दैनंदिन वाढत्‍या संख्येसोबत सक्रिय रुग्‍ण संख्येतही सातत्‍याने वाढ सुरू आहे. हा आकडा आता चारशेच्‍या उंबरठ्यावर पोचला आहे. शनिवारी (ता.२) जिल्ह्यात ६६ रुग्‍णांचे कोरोनाचे अहवाल पॉझिटिव्‍ह (Positive) आले. ४७ रुग्‍णांनी कोरोनावर यशस्‍वीरीत्‍या मात केली. यातून ॲक्‍टिव्‍ह रुग्‍ण संख्येत १९ ने वाढ झाली असून, सद्यःस्‍थितीत जिल्ह्यात उपचार घेणाऱ्या बाधितांची संख्या ३७२ वर पोहोचली आहे. (number of active patients is on near 400 Nashik Corona update news)

शनिवारी नाशिक महापालिका क्षेत्रात ३८, नाशिक ग्रामीण भागात २१, मालेगाव महापालिका क्षेत्रात एक, जिल्‍हाबाहेरील सहा अशा एकूण ६६ रुग्‍णांना कोरोनाची लागण झाल्‍याचे निदान झाले. सध्या सक्रिय असलेल्‍या ३७२ बाधितांपैकी २४३ बाधित नाशिक महापालिका क्षेत्रातील आहेत. नाशिक ग्रामीणमधील बाधितांची संख्यादेखील शंभराहून अधिक झाली असून, १०३ बाधितांवर सध्या उपचार सुरू आहेत. मालेगाव महापालिका क्षेत्रात दहा, तर जिल्‍हाबाहेरील १६ बाधितांवर सध्या उपचार सुरू आहेत. शनिवारी जिल्ह्याचा पॉझिटिव्हि‍टी दर २.८० टक्‍के राहिला. सर्वाधिक ७.२१ टक्‍के पॉझिटिव्हिटी दर हा नाशिक महापालिका क्षेत्रातील राहिला. दरम्‍यान, सायंकाळी उशिरापर्यंत ४६६ अहवाल प्रलंबित होते. यापैकी ३१४ प्रलंबित अहवाल नाशिक ग्रामीणमधील, तर ९८ प्रलंबित अहवाल नाशिक महापालिका क्षेत्र, मालेगावच्‍या ५४ रुग्‍णांना अहवालाची प्रतीक्षा होती.