वणी : वणी- नाशिक रस्त्यावरील ओझरखेड धरणाच्या कालव्याजवळील रस्त्यालगतच्या संरक्षण भिंतीस धडक देऊन अपघातग्रस्त आयशर गाडीत जनावरांचे मांस आढळले. याबाबत वाहन मालक व चालकावरोधात पोलिसांनी गुन्हा दाखल केला आहे.

वणी-नाशिक रस्त्यावरील ओझरखेड धरणाच्या कालव्याजवळील उतारावर असलेल्या संरक्षण भितींस २३ जूनला वणीकडून नाशिककडे जाणारी आयशर गाडी (MH17, BY2487) वरील चालकाचे नियंत्रण सुटून रस्त्याच्या संरक्षण भितींस धडक देऊन कलंडली गेली. नंतर चालकाने पळ काढला.

घटनेची माहिती मिळताच पोलिस घटनास्थळी दाखल झाले असता, वाहानाची तपासणी करताना वाहनात सुमारे ३ टन वजनाचे जनावरांचे मांस आढळले. याबाबत पोलिसांनी वाहन मालक वसीम अब्दुलकरीम कुरेशी (रा. भारतनगर, संगमनेर) व वाहनचालकाविरुद्ध अवैध मांस वाहतूक व अपघातप्रकरणी गुन्हा दाखल केला आहे. सुमारे दीड लाखाचे मांस व साडेचार लाखांचे वाहन, असा सहा लाखांचा मुद्देमाल पोलिसांनी जप्त केला आहे. पोलिस उपनिरीक्षक प्रवीण उदे व हवालदार एम. एल. बर्डे तपास करीत आहेत.