नाशिक : नाशिक महापालिकेच्या (nmc) स्मार्टसिटी कंपनीची अद्याप बरीच काम बाकी असल्याने आणखी साधारण जून २०२३ पर्यंत तरी कंपनीची काम चालणार आहे. कंपनीच्या एकूण साडेआठशे कोटीच्या कामापैकी जेमतेम ८ काम पूर्ण झालेली असल्याने एकूणच साडे ८०० कोटीच्या कामांसाठी पुढील वर्षाचा कालावधी महत्त्वाचा असणार आहे.

केंद्रातील भाजप (BJP) सरकारच्या संकल्पनेतून देशात स्मार्टसिटी संकल्पना राबविण्यात आली. स्थानिक स्वराज्य संस्थांचा काही टक्के हिस्सा घेऊन त्यात केंद्र शासनाच्या मदत निधीतून स्वतंत्र कंपनीच्या स्वरूपात स्मार्टसिटी ही संकल्पना राबविण्यात आली. याअंतर्गत एकंदर २२ कामे प्रस्तावित आहेत. आतापर्यंत 22 कामांपैकी स्मार्ट रस्त्यासह एकंदर ८ कामे पूर्णत्वास आली आहे. त्यात कालिदास कलादालनाचे नूतनीकरण, महात्मा फुले कलादालन, विद्युत शववाहिका, पंडित पलुस्कर सभागृहाचे नूतनीकरण अशी काही मोजकी कामे पूर्णत्वास आली आहे, तर अनेक रस्त्यांची कामे नागरिकांच्या तक्रारी आणि संथ कामकाजामुळे चर्चेत आहे.

दरम्यान, केंद्र शासनाच्या या संकल्पनेत ठराविक दिवसानंतर आणि स्मार्टसिटी कंपनीच्या उद्देशपूर्तीनंतर संबंधित कंपन्या त्या त्या स्थानिक स्वराज्य संस्थात विलीन करण्याचे प्रस्तावित असले तरी, नाशिकला मात्र किमान वर्षभर तरी स्मार्ट सिटीचे कामकाज पूर्ववत सुरू राहणार आहे. बहुतांश कामांसाठी स्मार्टसिटीतर्फे २४ ते ३० महिन्यांचा कालावधी निश्चित केलेला आहे. तसेच, केंद्र शासनाने यापूर्वीच स्मार्टसिटी कंपनीला जून २०२३ पर्यंत मुदतवाढ दिलेली असल्याने आणखी वर्षभर तरी स्मार्टसिटीची कामे सुरूच राहणार आहेत.