नाशिक : उपनगर हद्दीतील जयभवानी रोड परिसरात फर्नांडिसवाडीत गेल्या गुरुवारी (ता. १) मध्यरात्रीला जुन्या वादाची कुरापत काढून सराईत गुन्हेगार राहुल उज्जैनवाला याच्या घरासमोर सराईत गुन्हेगारांच्या टोळीने राडा घालत त्याच्या आईच्या दिशेने दोन राऊंड फायर केल्याचा प्रकार घडला.

याप्रकरणी अटक करण्यात आलेला संशयित संजय चमन बेद (३७, रा. फर्नांडिसवाडी, जय भवानी रोड, उपनगर) यास अटक केली असून न्यायालयाने तीन दिवस पोलीस कोठडी सुनावली आहे. (outbreak of gang war in Fernandeswadi Suspect in shooting case in custody Nashik Crime)

बरखा अजय उज्जैनवाल (रा. साईश्रद्धा अपार्टमेंट, जयभवानी रोड, फर्नांडिसवाडी, नाशिकरोड) यांच्या फिर्यादीनुसार, संशयित संजय चमन बेद, संजय बेद, टक्कू उर्फ सनी पगारे, बारक्या उर्फ श्रीकांत वाकुडे, इर्शाद चौधरी, दीपक पाट्या, गौरव गांडले यांच्याविरोधात उपनगर पोलिसात जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे.

फिर्यादी बरखा उज्जैनवाल यांचा मुलगा राहुल उज्जैनवाल याचे आणि संशयित टक्कू उर्फ सनी पगारे, मयुर बेद, संजय बेद यांच्यात वाद झाला होता.

मयुर बेद, संजय बेद यांच्या सांगण्यावरून संशयितांनी संगनमताने गुरुवारी (ता.१) मध्यरात्री उज्जैनवाल यांच्या इमारतीच्या पार्किंगमध्ये बाटल्या फोडल्या.

त्या आवाजाने बरखा उज्जैनवाल व त्यांचे पती हे घरातून बाहेर आले असता, संशयितांनी राहुलला समोर आणा नाहीतर तुमचा मुर्दा पाडतो असे म्हणत त्यांच्या दिशेने पिस्तुलातून दोन राऊंड फायर केले.

सुदैवाने यातून बरखा उज्जैनवाल या बचावल्या. या आवाजाने रहिवाशी जागे झाल्याने संशयितांनी दुचाक्यांवर पळ काढला. घटनेची माहिती मिळताच उपनगर पोलिसांनी संशयित संजय चमन बेद यास अटक केली असून, त्याच्या साथीदारांचा शोध सुरू आहे.

दरम्यान, संशयितांविरोधात मयुर बेद, संजय बेद व संशयितांविरोधात यापूर्वीच गुन्हे दाखल आहेत. तसेच, राहुल उज्जैनवाल याच्याविरोधात मारहाणीचे गुन्हे दाखल आहेत.

सराईत गुन्हेगारांच्या आपसातील वादातूनच सदरचा प्रकार घडल्याचे पोलिस सूत्रांनी सांगितले. सहायक पोलीस निरीक्षक सुयोग वायकर हे गुन्ह्याचा तपास करीत आहेत.