Nashik COVID Update : कोरोना नव्या व्हेरिएंटच्या पार्श्‍वभूमीवर महापालिकेकडून दोन हजार ८०८ रुग्णांच्या चाचण्या घेण्यात आल्या त्यातील २३ रुग्णांना कोरोनाची लागण झाल्याचे स्पष्ट झाले. त्यातील वीस रुग्ण कोरोनामुक्त झाले असून, तिघे होम विलगीकरणात आहेत.

कोरोनाचा वेग कमी होत असल्याचे यानिमित्ताने दिसून येत आहे. (Patients are corona free in city nashik news)

डिसेंबरमध्ये शहरात कोरोनाच्या नव्या व्हेरीएंटचा रुग्ण आढळल्यानंतर वैद्यकीय यंत्रणा ॲलर्ट'झाली होती. एकाच दिवशी कोरोनाचे तीन रुग्ण आढळले.

त्यामुळे दोन हजार ६४० जणांच्या ॲन्टीजेन टेस्ट करण्यात आल्या, तर १६८ जणांच्या आरटी- पीसीआर अशा एकूण २८०८ जणांच्या चाचण्या वैद्यकीय विभागाकडून केल्या होत्या. यामध्ये २३ कोरोना पॉझिटिव्ह आढळले. २३ पैकी वीस रुग्ण कोरोनामुक्त झाले तर तिघांना होम कोरोंटाईन करण्यात आले आहे.

डेंगी रुग्णांची संख्या घटली आहे. मागील दोन आठवड्यात ६१ संशयित रुग्णांचे रक्तनमुने तपासणीसाठी प्रयोगशाळेकडे पाठविले. त्यापैकी १७ जणांना डेंगी लागण झाल्याचे निष्पन्न झाले. वर्षभरात १,१९१ डेंगीबाधित आढळले.