नाशिक : (मालेगाव) तालुक्‍यातील द्राक्ष, डाळिंब उद्‌ध्वस्त झाल्यानंतर बागायत शेतकऱ्यांनी पेरू, बोर, चिकू, अंजीर, आंबा या फळांकडे मोर्चा वळविला. तालुक्‍यात बहुसंख्य भागात कलिंगड व खरबूज लागवड झाली. तालुक्‍यात सुमारे दोनशे एकर क्षेत्रात पेरूची लागवड झाली आहे. लॉकडाउनमुळे मजूर मिळणे कठीण झाले आहे. संचारबंदी व ग्राहकांअभावी तालुक्‍यातील पेरू उत्पादकांनाच सुमारे आठ कोटींहून अधिक फटका बसला आहे. शासनाने शेतमाल, फळे, भाजीपाला यासाठी स्वतंत्र यंत्रणा उभी करण्याची आवश्‍यकता आहे. 

प्रत्येकी पाच लाखांचे नुकसान

दाभाडी शिवारात विजय देवरे यांनी सात एकर क्षेत्रात व्हीएनआर जातीच्या पेरूची लागवड केली. उत्पादन चांगले यावे, यासाठी पेरू बागेवर नेट टाकले. पाच एकरांसाठी त्यांना तब्बल दहा लाख रुपये खर्च आला. 50 टन उत्पादन हाताशी आले असताना, बाजारात पेरू नेणे शक्‍य न झाल्याने त्यांचे सुमारे 25 लाखांचे नुकसान झाले आहे. अरुण देवरे, खुशाल निकम आदींसह चौघा प्रमुख बागायतदारांनी पाच एकर क्षेत्रात पेरू लागवड केली आहे. त्यांचे प्रत्येकी पाच लाखांचे नुकसान झाले. दाभाडी परिक्षेत्रात सुमारे 80 एकरांहून अधिक क्षेत्रात पेरू आहे. व्हीएनआर पेरू बागेसाठी एकरी एक लाख, तर अन्य जातीच्या पेरूसाठी एकरी 40 ते 50 हजार रुपये उत्पादन खर्च आहे.

हेही वाचा > महापौरांचे मुख्यमंत्र्यांना साकडे...'मॉलिक्‍युलर लॅबला तातडीने मंजुरी द्यावी'

शेतकरी हतबल होतोय

दाभाडी शिवारातील दिलीप निकम, गुलाब निकम, चद्रकांत अहिरे, महेंद्र अहिरे, पांडुरंग निकम, शंकर निकम, दिलीप शिवाजी निकम, संजय निकम, हरी निकम, देवीदास महाजन, रामदास महाजन, जयश्री निकम व अनेक शेतकऱ्यांनी दीड ते दोन एकर क्षेत्रात पेरू लागवड केली आहे. डोळ्यासमोर फळबागेतील पेरू गळून पडलेले पाहताना शेतकरी हतबल झाला आहे. हीच स्थिती कलिंगड, खरबुजांचीही आहे. 

हेही वाचा > ''ते'ही शेवटी माणसेचं न?...त्यांचे आरोग्यही महत्वाचे''...अन् लढविली अशी शक्कल