नाशिक : विनाहेल्मेट दुचाकीस्वाराला पेट्रोल दिल्यास पंपचालकांवर आत्महत्येस प्रवृत्त केल्याचा गुन्हा दाखल करण्याचा निर्णय पोलिसांच्या विचाराधीन आहे. तसा निर्णय घेतल्यास शहरातील शनिवारी शहरात पेट्रोलपंप बंद ठेवून पोलिसांच्या निर्णयाला विरोध करणार असल्याचा इशारा जिल्हा पेट्रोल डीलर्स वेल्फेअर असोसिएशनचे अध्यक्ष भूषण भोसले यांनी दिला आहे.

पेट्रोलपंप चालकांचा पोलिसांविरोधात बंद

शनिवार (ता.२) पासून दुचाकीवरील प्रवासासाठी चालकासोबत सह प्रवाशाला हेल्मेट सक्तीचे असल्याचा निर्णय पोलिस आयुक्तांनी घेतला आहे. मात्र, या निर्णयासोबतच पंपचालकांनी विनाहेल्मेट दुचाकीस्वाराला पेट्रोल दिल्यास संबंधित पंपचालकांवर दुचाकीस्वाराला आत्महत्येला प्रवृत्त केल्याचा गुन्हा दाखल करण्याचा निर्णय शहर पोलिसांच्या विचाराधीन आहे. पोलिस आयुक्तांनी अद्याप तसा आदेश काढलेले नसले तरी त्यांच्या यासंदर्भातील वक्तव्यावरून पेट्रोलपंपाचा विरोध सुरू झाला आहे. शहर पोलिसांची पंपचालकांवर गुन्हा दाखल करण्याची भूमिका धोकादायक असेल. कारण पेट्रोलपंपावर हेल्मेट घातलेले अनेक जण वाहन चालविताना हेल्मेट काढून ठेवतात. पेट्रोलपंपावर हेल्मेटसक्ती केल्याने रस्त्यावर हेल्मेट वापरण्यात खूप वाढ होत नाही.

दाद मागणार

उच्च न्यायालयाच्या दाखल याचिकेनुसार पोलिस आयुक्तालय कार्यालयाला यासंदर्भात सुनावणी घेण्याचे न्यायालयाचे आदेश आहे. १९ नोव्हेंबर २०२१ ला उच्च न्यायालयातील वकिलांतर्फे पेट्रोलपंप असोसिएशनने पोलिस आयुक्त कार्यालयाकडून याविषयी बोलाविण्यात आलेले नाही. हा विषय प्रलंबित असताना पुन्हा निर्णय घेणे चुकीचे आहे. याविषयी पालकमंत्री छगन भुजबळ यांची भेट घेउन त्यांच्याकडे दाद मागणार असल्याचे असोसिएशनने म्हटले आहे.