नाशिक रोड : बिटको हॉस्पिटलमध्ये आपत्कालीन वैद्यकीय मदत (Emergency medical help) पुरविणाऱ्या १०८ क्रमांकाच्या रुग्णवाहिकेचे (Ambulance) डॉ. ओंकार पाटील यांच्यावर हल्ला करणारे हल्लेखोर (Attackers) आणि एक गावठी पिस्तूल (Pistol) बाळगणाऱ्या युवकास पोलिसांनी ताब्यात घेतले. त्यांच्याकडून एक गावठी कट्टा व एक जिवंत काडतूस, मोबाईल, कोयता असा मुद्देमाल जप्त केला. (Police arrest suspects doctor attackers Nashik Crime News)

नाशिक रोडचे पोलिस निरीक्षक विशाल पाटील यांना मिळालेल्या माहितीनुसार ही कारवाई करण्यात आली. शैलेश गोपीचंद सहारे (२१, रा. नाशिक रोड) हा मालधक्का परिसरात संशयितरीत्या फिरत असून, त्याच्याजवळ कट्टा असल्याची माहिती मिळाली. त्यानंतर वरिष्ठ निरीक्षक अनिल शिदे यांनी तत्काळ गुन्हे शाखा अधिकारी, गुन्हे शोध पथकाचे अंमलदार यांना संशयितास ताब्यात घेण्याची सूचना केली. पोलिसांनी साध्या वेशात जाऊन सापळा रचला व सराईत शैलेश सहारे याला ताब्यात घेतले. त्याच्याकडे एक गावठी कट्टा, एक जिवंत काडतूस मिळाले.

तसेच बिटको हॉस्पिटल येथे डॉ. ओंकार पाटील यांच्यावर हल्ला करणारे संशयित प्रणव प्रदीप इंगळे (१८, रा. देवळाली गाव), शाहीद शौकत सय्यद (१८, रा. सत्कार पॉइंट, नाशिक रोड), यज्ञेश ऊर्फ मॅडी ज्ञानेश्वर शिंदे (१९, रा. चंदनवाडी, सुभाष रोड) यांना पोलिसांनी ताब्यात घेतले. तसेच, कलाम मन्सूरी (रा. गुलाबवाडी, मालधक्का रोड) हा फरार आहे. गुन्ह्यात वापरलेला कोयता, मोबाईल, अडीच हजार रुपये, असा मुद्देमाल ताब्यात घेतला. पोलिस निरीक्षक गणेश न्हायदे, राजू पाचोरकर, योगेश पाटील, जयेश गांगुर्डे, अनिल शिंदे, मनोहर शिंदे, विशाल पाटील, संदीप बागल, विष्णू गोसावी, कुवन राठोड, राकेश बोडके, श्री. जाधव, श्री. कोकाटे यांनी कामगिरी केली.