नाशिक : कोरोना निर्बंधात (coronavirus) स्वातंत्र्यदिनापासून शिथिलता देण्याचा निर्णय घेण्यात आला आहे. मात्र संभाव्य तिसर्‍या लाटेचा धोका (corona third wave) आणि कोरोनाचा धोका कायम असल्याने वाढते संकट लक्षात घेता नागरिकांनी काळजी घेण्याची गरत आहे. ‘ब्रेक द चेन’ चे निर्बंध शिथिल केल्यानंतर अनेक नागरिक विकेंडला घराबाहेर पडत पर्यटन स्थळांवर गर्दी करत असल्याचे समोर आले आहे.

ब्रह्मगिरी पर्वत प्रदक्षिणा बंद

सलग आलेल्या सुटयांच्या पार्श्वभुमीवर जिल्ह्यातील सर्व धरणे, धबधबे, पर्यटनस्थळांवर पर्यटकांची होणारी गर्दी लक्षात घेता ठिकठिकाणी पोलीसांची नाकाबंदी करण्यात आली आहे. तसेच श्रावण महिन्यात ब्रह्मगिरी पर्वतास घालण्यात येणारी प्रदक्षिणा बंद करण्यात आली आहे. प्रदक्षिणा मार्गावर पोलीस बंदोबस्त तैनात करण्यात आला असून नियमभंग करणार्‍यांवर कारवाई केली जाईल, असा इशारा पोलीस अधीक्षक सचिन पाटील यांनी दिला.

नाशिक पोलीसांचा कडक इशारा

यंदा शनिवार, रविवारी स्वातंत्र्यदिन आणि सोमवारी पारशी नुतनवर्ष दिनानिमित्त शासकीय सुटी असल्याने अनेकांकडून पर्यटनाचे प्लॅन आखले जात आहेत. परंतु आता पर्यटन स्थळांवर गर्दी करणार्‍या नागरिकांवर कारवाई करण्यासाठी नाशिक पोलीस अलर्ट झाले आहेत. नागरिक सर्व नियम धाब्यावर बसवत गर्दी करत असल्याचे काही दिवसांमध्ये निदर्शनास आले आहे. त्यामुळे आता नाशिक पोलीसांनी कडक इशारा दिला आहे.