नाशिक : नाशिक ग्रामीण पोलिस दलातील रिक्त १६४ जागांसाठी रविवारी (ता. २) गंगापूर रोडवरील केटीएचएम महाविद्यालयात झालेल्या लेखी परीक्षेला एक हजार ३२ जणांनी हजेरी लावली. ८४७ जणांनी दांडी मारली.

हजर परीक्षार्थींची बायोमेट्रिक चाचणी व ओळखपरेड झाल्यानंतर त्यांना परीक्षा केंद्रात प्रवेश दिला जात असल्याने नियोजित वेळेत ही प्रक्रिया पूर्ण न होऊ शकल्याने दीड तासाच्या (९० मिनिटे) लेखी परीक्षेसाठी परीक्षार्थींना काहीसा विलंब झाल्याचे समजते. (Police Recruitment 847 candidates for written exam 1032 Prospective Police Officers appeared for exam nashik news)

महाराष्ट्र पोलिस दलात गेल्या जानेवारीपासून पोलिस भरतीची प्रक्रिया सुरू आहे. नाशिक ग्रामीण पोलिस दलातील १५ पोलिस चालक आणि १६४ पोलिस शिपाई पदासाठी भरतीची प्रक्रिया राबविण्यात येत आहे. लेखी परीक्षेसाठी पात्र उमेदवारांना केटीएचएम महाविद्यालयात परीक्षेच्या एक तास आधी उपस्थित राहण्याचे आदेश देण्यात आले होते.

परीक्षा सकाळी दहाला होती. निर्धारित वेळेत जिल्हा, परजिल्ह्यातून परीक्षार्थी हजर झाले होते. लेखी परीक्षेसाठी दीड तासाचा (९० मिनिटे) निर्धारित वेळ होता. बायोमेट्रिक व ओळखपरेडची प्रक्रिया करण्यातच पोलिस प्रशासनाचा बराच वेळ खर्ची पडला.

परिणामी निर्धारित वेळेत लेखी परीक्षेला प्रारंभ होऊ शकला नाही. सुमारे दीड हजार उमेदवारांची बायोमेट्रिक चाचणी करण्यातच बराच वेळ गेल्याने लेखी परीक्षा काहीशी विलंबाने सुरू झाली.

हेही वाचा : शॉर्ट सेलर्स म्हणजे नक्की कोण?

लेखी परीक्षेच्या निकालाकडे लक्ष

मैदानी चाचणीच्या निकालात २९ उमेदवारांना ५० पैकी ५० गुण असून, ते सर्व माजी सैनिक आहेत. सर्वसाधारण आणि माजी सैनिक या वर्गवारीतल्या उमेदवारांचा कटऑफ ४३ गुणांचा आहे.

गृहरक्षक दल वर्गवारीचा ४२, महिला ४०, प्रकल्पग्रस्त ३६, अनाथ ३०, खेळाडू २९, भूकंपग्रस्त २६ आणि पोलिस पाल्य २५ या गुणांचा कटऑफ आहे. त्यामुळे लेखी परीक्षेचा कटऑफ अधिक राहण्याची शक्यता आहे. त्यामुळे परीक्षार्थींचे लक्ष आता अंतिम निकालाकडे लागले आहे.