अभोणा (जि.नाशिक) : संपूर्ण ग्रामीण भागात कोरोनाचा वाढता प्रादुर्भाव, (corona virus) कुठे ऑक्सिजनचा तुटवडा, (oxygen shortage) तर कुठे रेमडेसिव्हिरचा तुटवडा (redesivir shortage) अशा नकारात्मक वातावरणातही दह्याणे (पाळे) (ता. कळवण) येथील सोजाबाई पाटील (वय ८०) यांचा एचआरसीटी स्कोअर दहा असून, कुटुंबातील (family) सर्वजण पॉझिटिव्ह असतानाही सकारात्मक दृष्टिकोन व इच्छाशक्तीच्या जोरावर घरीच उपचार घेऊन कोरोनावर मात केली.

सकारात्मक दृष्टीने सावरले संपूर्ण पॉझिटिव्ह कुटुंब

पती मुरलीधर पाटील, मुलगा कारभारी (बापू) पाटील (स्कोअर ६), सून रेखा पाटील (स्कोअर ७), नातू तेजस पाटील (स्कोअर ६) जवळपास सर्वच कुटुंब पॉझिटिव्ह असताना फक्त मुलगा कारभारी पाटील यांनी नाशिक येथील लीलावती रुग्णालयात उपचार घेतले. इतर सदस्यांनी मात्र घरीच विलगीकरणात राहून उपचार सुरू ठेवले. जिद्दीच्या जोरावर सोजाबाईंनी संपूर्ण कुटुंबाला आधार देत कोरोनाला परतावून लावले. कुटुंबाच्या कुटुंबच विलगीकरणात, कुणाशी संपर्क नाही, कुणाचा आधार नाही. सर्व नकारात्मक परिस्थितीतही सोजाबाईंनी आपला धीर खचू दिला नाही. इच्छाशक्ती असेल, तर कोणताही आजार जीवघेणा नाही. याचा आदर्श या ८० वर्षांच्या आजीने समाजासमोर ठेवला.

दह्याने येथील पाटील कुटुंबाची कोरोनावर मात

आपले आचार-विचार शुद्ध आणि सकारात्मक असले, की मन स्थिर राहते. प्रतिकारक्षमता वाढते. कोणत्याही आजारावर सहज मात करता येते. जे कोरोनावर उपचार घेत आहेत. त्यांनी घाबरण्याचे काहीही कारण नाही. हा आजारसुद्धा सहज बरा होतो. फक्त इच्छाशक्ती ठेवा व वेळच्यावेळी योग्य उपचार घ्या. - सोजाबाई पाटील, दह्याणे, बऱ्या झालेल्या रुग्ण