Asha Worker : आशा कर्मचारी मनापासून काम करत असताना त्यांना मिळणारे तुटपुंजे मानधनही वेळेत मिळत नाही.

त्यामुळे आशा कर्मचाऱ्यांनी काम कसे करायचे, असा प्रश्न आशा सेविका व गटप्रवर्तक यांनी उपस्थित करत बुधवारी (ता.३१) जिल्हाधिकारी कार्यालयासमोर निदर्शने केली. (Protests by Asha Sevika group promoters drew attention to pending demands nashik news)

जिल्हाधिकारी जलज शर्मा यांच्या नावे दिलेल्या निवेदनात राष्ट्रीय आरोग्य अभियानात राज्यात सुमारे ७५ हजार आशा व साडेतीन हजारापेक्षा अधिक गटप्रवर्तक कार्यरत आहेत. गेल्या वर्षी त्यांनी राज्यव्यापी संप पुकारला होता. संप काळात तत्कालीन आरोग्य मंत्र्यांनी बैठक घेउन काही निर्णय घेतले होते.

त्यात आशा स्वयंसेविका व गटप्रवर्तकांना दिवाळी भेट दोन हजार रुपये दिवाळीपूर्वी देणार, आशा स्वयंसेविकांच्या मोबदल्यात सात हजार रुपयांची वाढ, गटप्रवर्तकांच्या मोबदल्यात ६२००ची वाढ, संप काळातील कामकाज पूर्ण केल्यास संपकाळातील मोबदला देण्याचे आश्वासन दिले होते.

त्यानुसार कामे पूर्ण केली परंतु त्यांचा मोबदला कपात केला आहे. यामुळे तो अदा करण्याचे व इतर आश्‍वासनांच्या पूर्ततेचे आदेश काढावेत यासाठी आंदोलन करत असल्याचे संघटनेचे राज्य अध्यक्ष कॉ. राजू देसले यांनी म्हटले आहे.