नाशिक : स्री-पुरुषाच्या नात्यातील सुखदुखाचा गुंता सोडविताना होणाऱ्या संघर्षाची कहाणी सांगणारी नाट्यकृती म्हणजे ‘कूस बदलताना’.

६२ व्या महाराष्ट्र राज्य हौशी मराठी नाट्य स्पर्धेत शुक्रवारी (ता. २४) एचएईडब्ल्यूआरसी रंगशाखा, ओझर या संस्थेतर्फे सादर करण्यात आली. भगवान हिरे लिखित या नाटकाचे चारुदत्त हिरे यांनी दिग्दर्शन केले. (Rajya Natya Spardha Struggle of Happiness in Relationship kus badaltana nashik)

आधुनिक काळात माणसाचे विचार, राहणीमान यांसह जगण्याची पद्धत देखील बदलत चालली आहे. ऐहिक सुखासाठी नवनवीन पद्धतींचा अवलंब केला जातोय. ‘लीव्ह इन रिलेशनशिप’ हा त्याचाच एक भाग.

मात्र लग्नाविना स्त्री-पुरुषांनी एकत्र राहणं जरी स्वातंत्र्याच वाटत असलं तरी रुढींचा पीळ त्याभोवती असतोच. हे स्वातंत्र्य असलेलं नात जितकं दीर्घ काळ पुढे जातं तसतसा तो पीळ देखील घट्ट होत जातो.

त्यामुळे नात्यातील गुंता कायम राहतो. नात्यातील हाच गुंता सोडविण्याचा व नवा विचार घेऊन नवी सुरवात करणारे कथानक ‘कूस बदलताना’ नाटकातून प्रेक्षकांनी अनुभवले.

रितेश गायकवाड, भारत मधाळे, रंजना चौधरी, शंकर वाघमारे, सुमन शर्मा या कलावंतांनी नाटकात भूमिका साकारल्या. नाटकाचे संगीत विकास शिंदे, तेजस बिल्दीकर तर प्रकाशयोजना संदेश सावंत, कृतार्थ कंसारा यांनी केली.

माणिक कानडे, अनुप खैरनार यांनी पात्रांच्या रंगभूषा तर लीना सोनार, राखी लढ्ढा यांनी वेशभूषा साकारल्या. नेपथ्य विजय घोरण, दीनानाथ प्रजापती यांनी साकारले.

पराग अमृतकर, रवींद्र शिंदे, मिलिंद मेधने, प्रवीण मोकाशी, दीपक ढोली, अशोक सोनवणे, तुषार जाधव, महेश बोरसे, प्रशांत हजारे यांनी रंगमंच सहाय्य केले.

मागे जा...

नाटकाच्या सादरीकरणादरम्यान नाटकाचे व्हिडिओ रेकॉर्डिगसाठी एकजण अगदी उत्साहात मंचासमोर येऊन उभा ठाकला. त्यामुळे प्रेक्षकांना अडथळा तर होतच होता मात्र परीक्षकांना त्याच्यामुळे रंगमंचावरी नाट्य पाहण्यास अवघड जात होते. त्यामुळे खुद्द परीक्षकांना त्याला मागे जाण्याची सूचना करावी लागली.

आजचे नाटक

विदूषक

लेखक- प्रभाकर दुपारे, दिग्दर्शक - मार्टिन