नाशिक : जिल्ह्यात कोरोनाचा संसर्ग (coronavirus) दर ४.३९ टक्के असला, तरी उसळणाऱ्या बेसुमार गर्दीमुळे आणखी आठवडाभर तरी निर्बंध शिथिल होण्याची शक्यता नाही. मात्र त्याच वेळी दुपारी चारपर्यंत दुकानाप्रमाणे मॉलला परवानगी देण्याचा प्रशासन विचार करीत आहे. (Restrictions-remain-malls-opening-permission-nashik-marathi-news)

दुकानाप्रमाणे मॉलला परवानगी?

मिशन अनलॉकअंतर्गत जिल्ह्यात सोमवार (ता. २१)पासून मॉल्स सुरू करण्याला परवानगी देण्याचा प्रशासन विचार करीत आहे.दरम्यान, शनिवारी (ता. १९) पालकमंत्री छगन भुजबळ कोरोनाचा आढावा घेऊन निर्णय घेतील. त्यामुळे दुसऱ्या टप्प्यातील पूर्ण अनलॉकची काही काळ प्रतीक्षा करावी लागणार आहे. सरकारच्या मिशन अनलॉकमध्ये नाशिक जिल्ह्याचा समावेश असून, तिसऱ्या टप्प्यातील निर्बंध लागू आहेत. जिल्ह्यात कोरोना रुग्णांच्या आलेखात दिवसेंदिवस घसरण होत आहे. त्यामुळे सोमवारपासून निर्बंधांमध्ये आणखी सवलत मिळण्याची आशा आहे. मात्र रुग्णसंख्येत घट होत असली तरी रुग्ण पॉझिटिव्हिटी दरात फारसा फरक पडलेला दिसून येत नाही.

वीकेंड लॉकडाउन कायम

नाशिक शहरात रुग्णसंख्येचा दर अडीच टक्के असताना ग्रामीणमध्ये हाच दर ५ टक्क्यांपेक्षा अधिक आहे. परिणामी तूर्तास दुकाने व आस्थापनांसाठी घालून दिलेली दुपारी चारपर्यंतची वेळेची मर्यादा कायम ठेवताना वीकेंड लॉकडाउन ‘जैसे थे’ सुरू राहणार आहे. जिल्ह्याच्या निर्बंधात कोणतेही बदल अपेक्षित नसले तरी सोमवारपासून मॉल्स सुरू करण्याची परवानगी दिली जाण्याची शक्यता आहे. इतर दुकाने व आस्थापनांप्रमाणे मॉल्सलादेखील दुपारी चारपर्यंत वेळेचे बंधन असेल, असे वरिष्ठांनी स्पष्ट केले आहे. त्यामुळे सर्वसामान्यांना काहीअंशी दिलासा मिळणार आहे.

गर्दी कायम

दुपारी चारपर्यंत सर्व बाजारपेठा सुरू ठेवण्यास परवानगी आहे. मात्र, तरीही बाजारपेठांमधील गर्दी काही कमी होत नाही. ही गर्दी संभाव्य तिसऱ्या लाटेसाठी निमंत्रण देणारी न ठरो या भावनेतून प्रशासन निर्बंध शिथिल करताना पूर्ण अनलॉकचा विचार करीत नसल्याचे समजते. पालकमंत्री छगन भुजबळ शनिवारी (ता. १९) कोरोना आढावा बैठक घेणार आहे. या आढावा बैठकीनंतरच अनलॉक निर्बंधातील सवलतींबाबत अंतिम निर्णय होईल. त्यामुळे जिल्हावासीयांच्या नजरा या आढावा बैठकीकडे लागल्या आहेत.