जुने नाशिक : उड्डाणपूल आणि त्यावरील लोखंडी पट्ट्या वाहनधारकांसाठी मृत्यूचा सापळा बनत आहे. गेल्या आठ दिवसात या लोखंडी पट्ट्यांवरून वाहने घसरून चार ते पाच अपघात झाले आहे. त्यात एकाचा मृत्यू, तर अन्य जन गंभीर जखमी आहे.

उड्डाणपुलावर बऱ्याच ठिकाणी लोखंडी पट्ट्यांचा वापर करण्यात आला आहे. पट्ट्यांचा काही भाग तुटला आहे. त्या पट्ट्यांवरून वाहने घसरून अपघात होत आहे. पावसाच्या पाण्यामुळे तर त्या अधिकच धोकादायक झाल्या आहे. गेल्या आठ दिवसात चार ते पाच दुचाकी घसरून अपघात झाले आहे. गुरुवारी (ता. २३) रात्री अशाच प्रकारे मालेगावला जाणारी दुचाकी घसरून गंभीर अपघात झाला.

त्यात जैनऊलबेद्दीन नामपूरवाला यांचा मृत्यू झाला. तर महम्मद अन्वर महम्मद यांची तब्येत गंभीर असून खासगी रुग्णालयात त्याच्यावर उपचार सुरू आहे. यापूर्वी झालेले अपघातातील काही जण गंभीर जखमी झालेले आहेत. भद्रकाली पोलिसांकडून त्या पट्ट्याची दुरुस्ती करत वाहने घसरणार नाही, यासाठी उपाययोजना करण्याचे पत्र राज्य व राष्ट्रीय महामार्ग प्राधिकरण विभागास देण्यात आले आहे. अद्याप त्यांच्याकडून कुठल्याही उपाययोजना करण्यात आलेल्या नाही. त्यामुळे अपघाताची मालिका सुरूच आहे.

दुसरीकडे वाहतूक पोलिसांचेदेखील दुर्लक्ष होत असल्याने संपूर्ण उड्डाणपूल मृत्यूचा सापळा बनत आहे. उड्डाणपुलावरून वाहन चालवत असताना किती वेग मर्यादा हवी, सध्या किती वेग मर्यादेने वाहने चालवली जात आहे, याकडे पोलिसांचे लक्ष नाही.

शिवाय दुचाकी वाहनांना उड्डाणपुलावर बंदी असताना सर्रास दुचाकी चालक उड्डाणपुलाचा वापर करत अतिशय वेगात दुचाकी चालवत आहे. त्याकडेही पोलिसांचे दुर्लक्ष होत आहे. शिवाय पोलिसांची उड्डाणपुलावर नियुक्ती नसल्याने चारचाकीसह मोठे वाहनाचा अधिक वेगात असल्याने वाहनचालकांचे नियंत्रण सुटून अपघात घडत आहे. महामार्ग प्राधिकरण विभागाने लोखंडी पट्ट्यांचे नियोजन करावे. तर पोलिसांनी वाहनांच्या वेगावर नियंत्रण आणावे, दुचाकीस उड्डाणपूल बंद करण्यात यावा. अशी मागणी नागरिकांकडून होत आहे.