Nashik Crime : गवंडगाव शिवारातील टोलनाक्याजवळ दोन ट्रकचालकांना दमदाटी करत लुटमार करत असताना दोघा लुटारूंच्या तालुका पोलिसांनी मुसक्या आवळल्या आहेत. यातील एकाविरुद्ध शिर्डी, लोणी राहता, कोपरगाव पोलिस ठाण्यात दरोडा, जबरी चोरीसारखे गंभीर गुन्हे दाखल आहेत. (Road robbers smile Yeola taluka police action during patrolling Nashik Crime)

नाशिक ते संभाजीनगर मार्गावत पेट्रोलिंग करीत असताना पोलिसांना अंदरसूल गावापुढे रस्त्यावर उभी असलेल्या ट्रकमध्ये संशयित हालचाली सुरू असल्याचे लक्षात आल्याने रात्र गस्तीवरील पोलिस इरफान शहा, ज्ञानेश्वर पल्हाळ, नितीन पानसरे, आबा पिसाळ आदींनी घटनेचे गांभीर्य पाहून तात्काळ ट्रकजवळ गेले.

पोलिसांना आलेले पाहून पळून जाण्याचा प्रयत्न केला मात्र पोलिसांनी पाठलाग करुन त्यांना पकडले. पोलिस निरीक्षक पांडूरंग पवार यांना माहिती मिळताच तत्काळ घटनास्थळी जाऊन दोन जणांना ताब्यात घेतले.

उभ्या असलेल्या ट्रक (एमएच १५,डिके ००२१) वरील चालक अशोक आनंदा निकम (रा. वाखारी, ता. देवळा जि. नाशिक) याने सांगितले की, पक्षीखाद्य घेऊन जात असताना ट्रक बंद पडल्याने रस्त्याच्या कडेला उभी केली होती.

तेव्हा दुचाकीने आलेल्या दोघांनी कोयत्याचा धाक दाखवून मोबाईल व रोख रक्कम लुटून नेली आहे.

हेही वाचा : Credit Card फसवणूक....काय घ्याल काळजी?

त्याबाबत तपास चालू असताना विकास विठोबा कदम (रा. गारखेडा ता. देवळगांवराज जि. बुलढाणा) यांने सांगितले, की ट्रक (एमएच १२,आरएन – ७१९९) चालवून घेऊन जात असताना अडवून कोयत्याचा धाक दाखवून दोन मोबाईल व रोख रक्कम काढून घेतल्याचे सांगितले.

संशयिताना पोलिसानी ताब्यात घेतले असून त्यांच्याजवळ लुटमार करण्यासाठी व धाक दाखविण्यासाठी लागणारा कोयता व लुटमारीचा मोबाईल व रोख रक्कम असा ४४ हजार ३२० रुपयेचा मुद्देमाल मिळून आला आहे.

संशयित सुकदेव गोरख मोरे (२७, रा. शनिमंदीर, राहता, जि. अहमदनगर), विकास मधुकर कांबळे (२४, रा. दहेगांव, ता. राहता) यांच्याविरुद्ध गुन्हा दाखल झाला आहे. त्यांना तीन दिवसाची पोलिस कोठडी मिळाली आहे.

सुकदेव मोरे यांच्याविरुद्ध शिर्डी, लोणी, राहता, कोपरगाव पोलिस ठाण्यात दरोडा, जबरी चोरीसारखे गंभीर गुन्हे दाखल आहे. पोलिस निरीक्षक पांडुरंग पवार यांच्या मार्गदर्शनाखाली हवालदार ज्ञानेश्वर हेंबाडे तपास करीत आहे.